Pynlut ka MePDCL 1.48 klur ban thied kali jingkieng ban maramot line bording

Syllad | The Rising MeghalayaMarch 4, 2025

U Myntri Rangbah ka Jylla u Conrad K Sangma haka 4 tarik Lber u la pyllait ia ki hynriew tylli ki kali ba kyrpang  kiba kot haduh T.1.48 klur ia kiba yn pyndonkam da ki lineman bad ki nongtrei ka MePDCL kiba leh ia ki kam maramot na ka bynta ban pynsuk ban shngain bad kloi ha ka jingai jingshakri.

Kine ki kali kiba la don lypa ia ki jingkieng kiba la pyndait kyrpang kin iarap ha kaba shna bad maramot ia ki waiar bording kiba don shajrong bad ha kino kino ki jaka. Haduh mynta ka MePDCL ka dang pyndonkam da ki kali ki bym don ei ei bad da ki jingkieng na ka bynta ki jingtreikam ha ka liang ka bording.

Hynrei kane ka dei ka sien kaba nyngkong eh ha ka jylla ba kane ka Tnad kan don ia kine ki kali kiba kyrpang ba la wanrah da ka MePDCL hapoh ka Meghalaya Power Distribution Sector Improvement Project ia kaba la bei tyngka da ka Externally Aided Project jong ka Asian Development Bank, ong ka Tnad lyngba u kyrwoh.

Baroh ki jinglut jingsep na ka bynta kane ka project ka ADB ka long haduh T.1225.74 klur kaba kynthup kham bun kiba iadei bad ki jingtei ia ki 24 tylli ki Sub Station kiba thymmai, ka jingpynbha ia ki 45 tylli ki Sub Station kiba la don lypa, 617 Ct Km jong u sainar na ka bynta ka lain bording bathymmai kaba 33 KV, ka jingpynbha ia ki 295 Ct Km u sainar elektrik jong ka 33KV uba la don lypa, u531 Ct Km u sainar elektrik ka 11 Kv kaba thymmai, ka jingshna pynbha ia u 188 Ct Km u sainar elektrik jong ka 11Kv line ba la don lypa, ka jingpyndait ia ki 1.80 lak Smart Meter. Ka jingiaid jong ka jingpyntrei ia kine ki kam ka la kot sha ka 62%.

Ka MePDCL ka dei kaba shim pura ia ka jingkitkhlieh ha kaba iadei bad ka jingpynbiang bording sha ki paidbah nongpyndonkam ha ka jylla Meghalaya. Haduh kumba 7,00,000 ki nongpyndonkam bording kynthup ia ki karkhana ki shaniah tylli ha ka MePDCL ha kaba iadei bad ka jingpynbiang bording baroh 24 kynta.

Ka jingpynbiang bording khlem jingthud ha ka por mynsngi bad mynmiet ka dei ka kam ba khraw na ka bynta ka MePDCL khamtam eh ha ka por ba duna um. Ka jingsam bording ha baroh ka jylla bunsien ka la ngat ha ki jingeh ha ka por lyiur. Kumta ban leh ia ki kam maramot bad pynbha ha ka por kaba lyngkot ka long kaba shem shitom shibun.