Pynlut ka sorkar 2000 klur tyngka man la u snem na bynta ka pule puthi: Conrad K Sangma

Syllad | The Rising MeghalayaDecember 18, 2021

Ka sorkar Jylla ka pynlut 2000 klur tyngka man la u snem na ka bynta ban kyntiew ïaka pule puthi haka Jylla hynrei wat la katta kam pat biang, ong u Myntri Rangbah ka sorkar Jylla u Conrad K Sangma haba kren kum u kongsan haka sngi pynhap pyrda ïaka jingrakhe dap 50 snem ne Golden Jubilee ka Sawlyngdoh Higher Secondary School, Mowkaïaw haka sngi Thohdieng.

Ha kane ka sngi la donlang u myntri ka tnad pule puthi ka sorkar Jylla u Ma Lahkmen Rymbui, u Myntri ka tnad pynroi sor ka sorkar Jylla u Ma Sñiawbhalang Dhar, ki dolloi, ki nonghikai, ki khynnah skul bad kiwei kiwei bad ïaka jingïalang la pynïaid da u MLA ka thaiñ u Ma Nujorki Sungoh haka phyllaw ka skul.

“Ka jingnang jjngstad kadei ka iktiar kaba lah ban wahrah ka jingkylla bad ka jingnang jingstad ka long ka thong kaba ha khmat eh jong ka sorkar Jylla”, ong u Conrad K Sangma.

Ula ong, ban kyntiew ïaka pule puthi, ka sorkar jylla ka la bhah lypa ïaka mang tyngka na ka bynta ban pynbiang ïaki jingdonkam, ban tei pynbha bad ban kyntiew noh ïaki skul Lower Primary, ki Higher Secondary School bad ki kolej kiba don haka Jylla.

U Conrad ula pynkynmaw ruh ba ha u snem 2018-19 haka por ka jingïalap election ula ban jur bha halor ka pule puthi bad ula shem shitom bha haba ïadei bad kane hynrei haki Saw snem kiba la leit ula ong ba la ïohi ba ka don ka jingkylla haka liang ka pule puthi.

Ki kam kiba ym lah ban pyndep da ki 10-15 snem hynrei kane ka sorkar kaba mynta ka la leh ïaki ha saw snem ba la leit. Haba iadei bad ka jingduh tulop jong ki nonghikai SSA ula ong, ha kylleng ka ri bun ki Jylla kiba ki nonghikai ki duh tulop hynrei hapoh ka Jylla, ka sorkar ka la wad ki lad ki lynti kumno ban pynbeit ïa kane ka jingeh.

Kiwei de kiba ai jingkren ki long u Ma Lahkmen Rymbui, u Ma Sñiawbhalang Dhar, ka Principal jong ka skul ka Kong Y. Lyngdoh bad u D. Lathong Secretary Saw Lyngdoh Higher Secondary School uba la pynsngew ïaka khana lyngkot jong ka skul.

Katto katne ka khana lyngkot, ïaka Saw Lyngdoh Higher Secondary School la la seng ha u snem 1971 da u (L) Thomlin Suchiang ryngkat ki riew rangbah ka shnong Mukhap, Mowtyrchiang bad Laskeiñ.

Ha katei ka por ïaka skul la tip ïaka kum ka Raliang Sawlyngdoh High School bad hadien la pynkylla ïaka shaka Sawlyngdoh High School Mowkaïaw namar ka hap hapoh ki Sawlyngdoh kum Lyngdoh raij Lapne, Lyngdoh raij Ïonglang, Lyngdoh raij Niawkmai bad Lyngdoh raij Khonshnong.

Ha u snem 1979 ka skul ka ïoh ban phah ïaki khynnah sha ka HSLC Examination kum ki private candidate. Ha u snem 1984 ka la ïoh ïaka jingithuh na ka MBOSE. Ha u snem 1999 la plie ïaka Higher secondary (Art stream), ha u 2014 ka skul ka la ioh iaks center ban thoh ïaka eksamin SSLC bad u 2015 la plie ïaka Science stream bad kumba long mynta la don 500 ngut ki khynnah ba pule ha katei la skul.