Pynlut ka sorkar T.2.13 klur na ka bynta 23 ki prokram ba la pynlong ha artylli ki 5 star hotel

Syllad | The Rising MeghalayaFebruary 23, 2024

U Myntri Rangbah ka Jylla, u Conrad K Sangma u la pyntip hapoh ka iingdorbar thawain ha ka 22 tarik Rymphang ba ka sorkar ka la pynlut T.2.13 klur na ka bynta ka jingpynlong ia ki 23 tylli ki prokram hapoh Taj Vivanta bad JW Courtyard.

 Na kane T.62.47 lak la pynlut na ka bynta ka jingpynlong ia ka G-20 summit, ong u Sangma haba jubab ia ka jingkylli ba la wanrah da u nongmihkhmat ka Mawkynrew u Bah Banteidor Lyngdoh. 

Haba kylli halor ka jingdonkam ban pynlong ia ki prokram sorkar ha kiba kum kine ki hotel ba remdor, u CM u la ong, “Ka sorkar ka hap ban pynlong ia ki prokram, ka dei ka rukom kaba ju leh.Ka dei ka jingsarong ba ngi la lah ban pynlong ia ka jingialang G-20 summit, kam long kaba sngewpher namar ngi lah ban pynpaw bad pynbit pynbiang na ka bynta ki delegate khnang ba kin leitphai ryngkat ki jingshah kynmaw kiba sngewtynnad.”

Watla katta u la ong ba kane ka shong ruh ha ki jait prokram ba pynlong, kata ka sorkar kan hap ban jied ia ki jaka katkum ka jingdonkam.

Nalor kata u CM u la ong ruh ba haduh jan kumba 80 haduh 85 percent ki nongtrei hapoh kine ki artylli ki hotel ki dei ki trai shnong.

Ha kaba iadei bad ka jingai jingmut jong u MLA ka Congress na Gambegre u Saleng A Sangma na ka bynta ban kyntiew ia ki nongseng kam kiba dei ki trai shnong ka jylla, u CM u la ong ba ka CM Elevate programme ka thmu na ka bynta ban kyntiew ia ki nongseng kam lajong namar na ka liang ka sorkar ka la shim ia ki sienjam ban kyntiew ha kaba iadei bad ki home stay bad kiwei kiwei pat ki jaka sahkai pyngngad.