Pynmih jingbthah ka NHRC ia ka Sorkar pdeng bad Jylla ban iada ia ki hok jong ki thei iap lok

Syllad | The Rising MeghalayaJune 13, 2024

Ka National Human Rights Commission (NHRC), India ka la pynmih ia ka jingbthah ia ki bor sorkar hapoh ka Sorkar Pdeng bad Sorkar Jylla bad Union Territories ba kin pynthikna na ka bynta ban aijingiada ia ki thei iap lok ne riew kynthei  katkum  ki hok longbriew manbriew ne human rights.

Ka Commission ka sngew ba ka long kaba donkam ban pynmih ia kane ka jingbthah hadien ba ka la sakhi ba ki thei iap lok nalor ka jingshah ktah halor ka jingduh noh ia la ki kurim ki ju ngat ruh ha kiba bun ki jingeh, kata kaba kynthup halor ka jingduna ha ka jingshah kynthup ha ka imlang sahlang, ka jingduh ha ka liang ka ioh ka kot bad wat ka jingduh noh ia la ki jong ki jaka shong jaka sah.

Ka Commission ka la kdew ba ki longkmie ki don haduh kumba 78% na baroh ki nongshong shnong kiba dei ki thei iap lok kiba don haduh 5.6 klur ha India katkum ka khanasamari jong u snem 2011. Ki thei iap lok barabor ki la shah iehnoh bein bad hap ban kyrshan ia lade hi hadien ka jingkhlad noh ki kurim jong ki. Khlem ka jingkyrshan kaba biang na kiba haiing hasem jong ki bad namar ka jingbym biang ha ka kamai kajih, ki ju shah pynjngai na ka imlang sahlang, bad shah pynborr uh wat ban mih noh na la ki jong ki iing ki sem bad ban leit wad ia ki jaka shongrieh kumjuh sha ki jaka leh niam. Ka jingkiew ha ka jingduna ia ka jingnag jingtip bad ka jingduna ha ka liang ka ioh ka kot ka la nangkham pynsniew shuh shuh ia ka jinglong jingman.

Kumta ruh da kaba phaikhmat na ka bynta ka bha ka miat jong kine ki riewkynthei, ka NHRC, India ha ka jingai jingmut ka la pynleit jingmut halor ki 10 tylli ki mat bad halor ki sienjam lyngba ka Sorkar Pdeng, Sorkar Jylla bad ki UT ba kin leh ei ei.

Kine ki kynthup halor ka jingpynthikna ha kaba iadei bad ki kot ki sla kum ka jingpynithuh, ka jngiarap ban shna bad pynbha ia ki iing ki sem na ka bynta jong ki, ka jingpynioh mar kumjuh ia ki hok halor ki jingdon jingem, ka jingkhanglad ban beh ia ki na la ki jong ki iing ki sem bad ban aijingiada na ka jingshah ialam bakla, ka jingplielad ha ka liang ka iohkam ioh jam kaba neh, ka jingsumar halor ka koit ka khiah ha ka liang ka pyrkhat pyrdan, ka jingpyniasoh hapoh ka imlang sahlang, ka jingduna ka jinglum jingtip halor ki mat kiba iadei bad ki riewkynthei, ka jingpyntreikam ia ki jingtip bad ki jingai jingmut ba hashwa kaba kynthup halor ka jingbishar bniah ia ka Windows (Protection and Maintenance) Bill, 2015’ ba la wanrah da u Janardan Singh Sigriwal, MP ha ka 17 Lok Sabha bad halor ka kaipot jong u snem 2017 jong ka Committee ba la haw hapoh ka hukum jong ka iingbishar Supreme Court khnang ban lah ban thaw ia ki kyndon ain ki ban lah ban iarap na ka bynta ki riew kynthei.

Ia ka jingbthah kaba bniah lah ruh ban ioh lyngba ka NHRC, India website www.nhrc.nic.in lane ha kane ka link Advisory on the Protection of Human Rights of the Widows