Pynmih jingbthah ka tnat ka koit ka khiah ba nang saphriang ka jingpang khmat

Syllad | The Rising MeghalayaAugust 20, 2023

Namar ka jingnangkiew ha ka jingdon jong ki briew kiba ngat ha ka jingpang saw bad dait ki khmat ba la tip kum ka Conjunctivitis hapoh ka district, na ka liang ka Medical & Health Officer (DMHO) ka East Khasi Hills District, Shillong ka Dr. A Lyngdoh ka la pynmih ia ka jingbthah ban khanglad bad ban iada na ka jingsaphriang jong kane ka jingpang kaba iabit.

Ia kane ka jait jingpang khmat la tip ruh kum ka ‘eye flu’ lane ka ‘pink eye’ ka dei ka jait jingpang kaba kloi ban iabit da kaba suk na uwei u briew sha uwei pat tang lyngba ka jingpeit markhmat bad ki briew kiba ngat ha kane ka jingpang lane lyngba kino kino ki tiar kiba jabo

Ki dak ki shin jong kane ka jingpang ki kynthup ia ka jingsaw, jingsieb, ka jingmih um ha ki khmat, ka jingdait ki khmat, ka jingbym lah ban peit sha kiba shai bad ka jingdambit ha ki pyried ‘mat ne eyelids ha ka por ba khie mynstep.

Da kaba bud ryntih ia kine ki jingbthah kiba dei ban leh bad ki bym dei ban leh ngin lah ban iada na ka jingiabit bad ka jingsaphriang jong kane ka jait jingpang.

Pyrshang ban sumar khuid da kaba bteng ban saitkhuid iala ki kti da ka sabon. Lada phi iabit ia kane ka jingshitom pynjngai ia lade da kaba shongkhop ha la iing bad kiar na ka ban peit markhmat bad kiwei pat tad haduh ban da jah ka jingsaw ha ki khmat.

Lada ki dak ki shin ki dang iai neh wat haduh palat 5 sngi lane ka jingshah ktah ha ka bor iohi, ka jingpang jur ha ki khmat, ka jingbym lah shah ia ka jingshai nalor ka jingmih ‘eitmat kaba rben dei ban pyntip mardor sha  ki doktor.

Kiei kiba phim dei ban leh ka long; Kiar ban ktah ia ki khmat, kiar ban pyndonkam lang ia kijuh ki tiar ki tar ba dei shimet, wat ju pyndonkam ia ki  contact lense bad sangeh ban leit sha skul, kolej, ophis bad kino kino ki kam lada phi dang shah ktah ha kane ka jingpang tad haduh ban da duna ne jah ka jingsaw ha ki khmat.