Pynmih jingmaham ka tnat IMD ba lah ban syllad u ‘lapbah ia ka Meghalaya bad Assam

Syllad | The Rising MeghalayaAugust 27, 2023

Ka Tnat Indian Meteorological Department mynta ka sngi ka la pynmih ia ka jingmaham ba u ‘lapbah u lah ban syllad tyngeh ia ka jylla Meghalaya bad  Assam mynta ka 27 tarik bad ha ka 28 tarik mynta u bnai, kata ka jingioh slap kaba lah ban kot haduh  (115.6 haduh  204.4mm).

Nalor kata ka IMD ka maham ruh halor ka jinglah ban shah ktah jong ki shnong ki thaw na ki jingjia jong ka jingshlei um na ka jingther jong une u ‘lapbah.

Shibynta jong ki lad jingiada, ka IMD ka la pynmih ka jingbthah ia ki nongshong shnong ba ki dei ban kiar ban leit sha kito ki jaka um kiba ju ngat ha ki jingshlei um bad ruh ban kiar na ki jaka bad ki jingtei kiba don jingma na ka jinglah ban twa.

Kane ka jingmaham kaba hap ba ka thup Orange/Amber ka thmu ban kyntu ia ki paidbah ba ki dei ban long kiba la husiar halor kane ka jingsyllad jong u ‘lapbah kaba lah ban pynthut ia ki lynti surok, lynti rel bad wat ia ka tnat bording.