Pynmih u DC ka EJH ia ki jingbthah ban iada ia ka jinghap jong ki khynnah ha ki thliew ksam um

Syllad | The Rising MeghalayaAugust 10, 2023

U Deputy Commissioner ka East Jaintia Hills District, Khliehriat ha ka sngi Balang ba la lah u pyntip paidbah ha kaba iadei bad ki jingbthah ba la pynmih da ka iingbishar Supreme Court khnang ban khanglad ha kaba iadei bad ka jinghap jingliat jong ki khynnah khunlung hapoh ki thliew ksam um ne jaka pynlang um hapoh ki shnong ki thaw ki jong ki.

Katkum kine ki jingbthah, ki trai jong ka jaka hashwa ba kin shim ia ki sienjam ban shna ia ki jaka ksam um ne pynlang um, ki trai jaka ki dei ban aijingtip da ka jingthoh la kumno kumno 15 sngi shwa sha ki bor sorkar jong ka thain, kata sha u District Collector lane u District Magistrate lane ki heh ba dei khmih jong ka tant Ground Water/ Public Health, ka Municipal Corporation.

Dei ban pyntip ia ka rejistration jong baroh ki drilling agency kata la ki dei ki jong ka sorkar ne semi lane shimet bad ki bor district ne ki bor ba dei khmih katba ka shong.Dei ban wah ia ki signboard ha ka por ba pyntrei hajan ka thliew ne pung ha ryngkat ki jingthoh kiba bniah ha kaba iadei bad ka address jong ka drilling agency ha ka por ba dang pyntrei ne pynbha ia ka pung bad ruh ia ka address ba pura jong u trai pung.

La bthah ruh ba dei ban ker sainar sawdong jong ka pung ne thliew bad ruh ban tap bha da ka dewbilat sawdong jong ka pung.Lada jia ba donkam ban shna ne repair ia ka pump ym dei ban shu ieh ia ka thliew khlem da tap.Ia ki thliew kiba ym pyndonkam shuh dei ban tap noh da ka khyndew ne shyiap ne da ki maw.

Halor kane ka bynta la aibor ia u district collector ne kiwei pat ki bor ba dei khmih ba kin pynthikna halor ka jingbud ryntih ia ki jingbthah.Ha ki thain nongkyndong ki nongkhmih ia kane ka bynta kin long lyngba ki nongialam shnong bad ki heh na ka tnat Agriculture, katba ha ki jaka sor kin long lyngba ki Junior Engineer bad ki heh sorkar na ka tnat Ground Water/ Public Health/Municipal Corporation bad kiwei pat.