Pynmih u DC Khliehriat ïa ki kam bala bynshet haka COVID-19 Village Committee ban tem iaka jingpur ka khlam

Syllad | The Rising MeghalayaApril 29, 2021

U Deputy Commissioner, East Jaintia Hills District, Bah E Kharmalki haka sngi Palei ula pynmih paidbah iaki kam kiba la bynshet COVID-19 Village Committee ban iakhun pyrshah ban tem iaka jingpur sted u khniang jingpang Coronavirus, uba la pur sted bha mynta hapoh ka Ri India bad kumjuh haka jylla.

U Deputy Commissioner Bah Kharmalki, ula ong ban tem ia kane ka jingsar ka khlam COVID-19 ula khot ka jingiatreilang jong bad baroh khamtam COVID-19 Village Committee bad ula pynmih paidbah ruh iaki ki mat trei kam ba kongsan na ka bynta ka COVID-19 Village Committee hapoh ka district

Kine harum ki dei ki mat treikam jong ka COVID-19 Village Committee:

Ka COVID-19 Village Committee ka dei ban wad jaka kaba bit ban pynlong kum ka quarantine sentar na ka bynta ka shnong. Baroh ki khun ka shnong kiba wan phai na bar jylla, lane kiba wan shim dawai na ki hospital na Shillong, Guahati, Silchar bad na kiwei kiwei ki jaka, lane kiba don dak malu mala jong ka jingpang Corona Virus kin hap sah ha kane ka sentar shipor na ka bynta 7 (Hynniew ) sngi na ka bynta ki High Risk/Returnees bad 14 (Khadsaw) sngi ia kiba positive. Ka committee ka dei ruh ban peit bad kit khia ia ki jingdonkam kum ka bam, ka um, ki dawai, bad kiwei kiwei na ka bynta kito ki khun ka shnong kiba sah ha quarantine sentar.

Shuh shuh, ka COVID-19 Village Committee ka dei ban pynkhreh bad pynbit pynbiang ia ka jingdonkam ha ka quarantine sentar kum ka painkhana, ka light, ka um, ka jingkhuid jingsuba; lada ym pat don lypa da kaba ia trei lang bad ki bor shnong. Ka hap ruh ban buddien ia ki contact ne jingiatyngkhuh/jingiakynduh jong kito ki briew kiba don ia u khniang jingpang coronavirus ha dein ba la dep test bad la tikna bad ban ai ia ka report sha ki doctor ne Executive Magistrate kiba hap hapoh ka CHC/PHC jong ki mar mar lada shem/lap ia kiba kum kita.

Katkum ki mat treikam, ka COVID-19 Village Committee ka hap ban pyniad ia ki program pynshai bad hikai paitbah hapoh ka shnong ban pyntip shaphang u khniang jingpang corona virus kum ki dak ki shin ia u nongpang; ki lad jingiada kum kaba kiar na ka jingialum paitbah, ka jingbiah pathar, ka jingiakhublei kti; ban deng ia ki mask haba mih shabar, ban ia jngai shi metar palat haba ia trei kam ne shnong jingialang bad kumta ter ter.

U Deputy Commissioner u la kyntu ruh ia kane ka committee ban bud dien bad peitngor bad hikai hapoh shnong ba kan ym don ka jingleh niewbein/jingkyntait ha ka imlang sahlang ia ki briew kiba ngat ha u khniang corona virus lane kiba wan na shabar ka shnong, kumjuh ruh ban iarap bad hikai ia kiba ha iing, ki bor shnong bad ki nongshong shnong kumno ban leh lada don ki khun ka shnong kiba iap na ka jingpang corona. Ki jinghikai ba ki dei ban ai ki kynthup ia kiei kiba dei ban leh bad kiei kiba ym dei ban leh, bad ban iasyllok ia ki trai ing ba iap bad ia ki khun ka shnong ba kin ym tieng ne khih lynga lada don kum kita ki jingiap hapoh shnong.

Kane ka Committee ka dei ruh ban leit ia shim bynta ha ki prokram ai jinghikai bad ai jingpynshai kiba ki bor sorkar ki pynlong ha kaba ia dei bad u khniang corona virus ne COVID-19. Ka committee kan peit bad wad ia ki briew kiba tymmen hapoh ka shnong namar kine ki briew ki kloi ban kem pang.