Pynngat micro containment iaki ïing bad ka kyntoit ha Jowai

Syllad | The Rising MeghalayaAugust 4, 2021

Hadien bala kiew ka jingiabit jingpang khlam COVID-19 ha Jowai, khamtam ha kawei ka kyntoit ha Riatmoolain, Ladthadlaboh bad ar tylli ki ïing ha Dongmihsngi, u District Magistrate West Jaintia Hills haka sngi Balang ula pynngat iaki hapoh ka micro containment ban tem iaka jingpur ka khlam.

Kine ki iing ki dei jong ka kong N Lyngdoh bad u Harness Papeng ha Dongmihsngi bad ka kyntoit ha Riatmoolain ka jaka bala shah pynngat containment kadei naduh Khlieh Um Sorkar bad Um Sorkar Cluster.

U District Magistrate ula ong ba kine ki ïing bad kane ka kyntoit ka donkam ban pyndep iaka jingleh iaki test bad active surveillance ban tem iaka jingpur ka khlam.

Kane ka hukum kan treikam mardor tad haduh bala pynbna da kumwei.

Ym shah iano iano ban rung sha ka containment bad kiba shong ba sah hapoh ka containment ruh kim bit ban mih shabar bad ki dei ban shong pynkyrpang ialade ha ki iing ki sem jong ki.

Ym shah ban pynlong ia kino kino ki jait jingialang bad ki kali kiba iaid lyngba ka containment ruh kim bit ban sangeh ha shiteng lynti haka jaka kaba la pynngat containment.