Pynpaw ka DS Umiam ia ka jingbym hun halor ka jingkhynra bar Jylla da ka tnad sorkar

Syllad | The Rising MeghalayaJuly 23, 2024

Ka Dorbar Shnong Umiam, Ri Bhoi District ka la pynpaw ia ka jingbym hun ia ka rukom khynra ia ki bar jylla kiba wan trei bylla ha kiba bun tylli ki karkhana kiba don hapoh ka Umiam Industrial Area ia kaba la pynlong da ka tnad Labour bad ki bor ba dei khmih ka Khasi Hills Autonomous District Council kaba la long ha ka 22 tarik Naitung.

Na ka liang u Bah Stevenson Kharkrang, Rangbah Shnong ka Umiam haba kren bad ki lad pathai khubor u la pynpaw ba kum ka Dorbar Shnong hi hadien ka jingpyntip jong kine ki tnad treikam ka sorkar jylla ban pynlong ia ka jingkhynra ia ki kot ki sla ba biang jong ki bar jylla kiba trei bylla ha ki karkhana bapher bapher kiba don ha ka thaiñ Umiam, kum ka shnong ka la ia don bynta lang ha kane ka jingkhynra hynrei kaba sngewdiaw ka long ba kim hun satia ia ka rukom khynra ia ki kot ki sla jong ki spah ngut ki bar jylla kiba don bad trei bylla ha kine ki jaka.

Nalor kata u la ong ruh ba kum ka Dorbar Shnong hi kam banse ban shimkhia halor kane ka kam ban phah pynbiang ia ki kot ki sla kiba biang kata naduh ki Labour Lisence, Trading License, ka Police Verification ia ki bar jylla hapoh ka lai sngi lem kumta na ka liang ka Dorbar Shnong Umiam kam banse ban shim pat da ki lad ba tyngeh pyrshah ia ki bar jylla kiba wan trei bylla ha kine ki karkhana kiba hap hapoh ka jingpeit pyrman jong ka Dorbar Shnong Umiam.

Shuh shuh u Bah Kharkrang u la pynpaw ruh ka jingsngewkhia halor ka jinglaitlan jong ki bar jylla ban wan rung shapoh ka jylla Meghalaya na ka bynta ban trei bylla khlem ka jingphikir kaba thikna bad kaba la kylla long ruh ka daw bah jong ka jingkynrei jong u drok hapoh ka jylla bad kaba buh ruh ka jingma kaba khraw ia ki khun samla ha ki shnong ki thaw ha kylleng ka jylla.