Pynpaw ka GAM ba kam shym la leh pathar ia ki tiar ialehkai Gymnastic hapoh JN Complex

Syllad | The Rising MeghalayaDecember 18, 2023

Ka Gymnastics Association of Meghalaya (GAM) lyngba une u kyrwoh ka pynpaw ba hadien ki jingpyntrei hapoh JN Complex, kumta ruh ia baroh ki tiar ialehkai Gymnastic kata naduh ki floor excercises matresses, vaulting table, trampoline, balancing beam la hap ban buh noh ha ki bynta bapher bapher jong ka SAI NEHU da ka jingioh jingbit na u Director ka SAI.

La ong ruh ba katkum na ki dur ba la sakhi kine ki tiar kiba kynthup ruh ia ki pommel horse, parallel bars, spring board ha kaba nyngkong la buh hapoh ka jaka ban rung shapoh JN Stadium, hynrei namar ki kam maramot ha kane ka jaka la kyntu ia ka MGA ban pynkynriah noh ia ki sha kiwei pat ki jaka.

Kumta ruh ka MGA ka don tang kawei ka lad kaba ka lah ban leh, kata ban wad jaka buh ia kine ki tiar hapoh JN Complex namar ka jingbym lah ban pynkynriah ia ki shapoh ka Multipurpose Indoor Hall namar ka jingkhapngiah. Hadien ba la wad ia ki lad ki lynti ban ioh ia ka hall na ka bynta ban pyniaid shakhmat ia ki jingai jinghikai, kiba bun ki Durbar hall bad ki hall shimet ki la kyntait ban pdiang ia ka Gymnastic namar ka jingdon bun palat ki tiar ba pyndonkam nalor jinghap ban siew ia ka bai wai kaba rem.

Ka Association ka pynpaw ruh ba kim shym la bret satia ia kine ki tiar, hynrei ki la buh bha ia ki ha ka rukom kaba dei kumba la sakhi ha ki dur namar kine ki tiar ki dei kiba la shna da ka steel kiba lah ban shan bad kyrda wat lada jia kino kino ki jingjia shah pynjulor ha ki bor ka mariang.