Pynpaw ka JSU ia ka jingbym hun halor ka rukom pynbna ia ka result ki Staff Nurse bad ANM

Syllad | The Rising MeghalayaSeptember 29, 2024

Ka Jaintia Students’ Union (JSU) ha ka 28 tarik Nailur ka la pynpaw ia ka jingbym sngewhun ha kaba iadei bad ka rukom pyllait ia ka result jong ka eksam ki Staff Nurse bad ANM ha ka 27 tarik Nailur 2024 ia kaba la pyllait lyngba ka website www.meghealth.gov.in.

Ka JSU ka la ong lyngba u kyrwoh ba kane ka jingpyllait ia ka result tang lyngba u Roll Number jong ki nongiakhun ia ka eksam khlem da pynpaw ia ka jingioh marks ka jong ki ka buh ia ka jingartatien halor ka jinglong khuid bad shai.

Kumta ka JSU ka dawa na ka Tnad ka Koit ka Khiah ba kan pynmih biang da kawei ka result na ka bynta ka eiksam jong ki Staff Nurse bad ANM da kaba pynmih ryngkat ia ki Roll Number bad ki marks ba la ioh da ki nongiakhun.

Da kaba kyntu ia ka jingtuklar lem jong ka Myntri ka Tnad ka Koit ka Khiah ka Kong Ampareen Lyngdoh halor kane ka kam, na ka liang ka JSU ha ka shithi ka la ong ba kane ka rukom treikam ka ban pynbna tang ia ki Roll Number jong kiba pass khlem da pyni ia ka jingioh marks ka pynpaw ia ka jingartatien halor ka jinglong khuid bad suba.

Ka JSU ka la ong ruh ba ka jingbym pyni ia ka jingioh marks kam pynioh satia ia ka hok ne ban pynshai sha ki nongiakhun ia ka eksam kiba la trei minot ban pynkhreh ban iakhun ia ka eksam.

Nalor kata ka JSU ka la ong ruh ba ka la sakhi ia ki jingduna ha ka jingpynbna ia ka result, kata kynthup halor ka jingmih bunsien jong u juh u Roll Number, bad kaba kum kane ka jingbakla ka pynduh mynsiem bad jingshaniah ha kaba iadei bad ka rukom pynlong ia ka eksam.

“Ngi kyntu jur ia ka Myntri ba kan shimkhia lem mardor halor kane ka kam. Ngi kyrpad ruh ba dei ban pynmih biang da kawei pat ka result, kata da kaba pyni ia u Roll Number bad ia ka jingioh marks jong iwei pa iwei ki nongiakhun eksam. Kane ym tang ba kan kyntiew ia ka jinglong khuid bad shai ha ki rukom treikam, hynrei ruh kan pynioh ia ka jingshaniah ha kaba iadei bad ka jingpynlong ia ki eskam bapher bapher,” ong ka JSU ha ka shithi.