Pynpaw u CM ba donkam ka jylla ban kynjoh 11.5 % ka jingkiew ka GDP: Buh Mawnongrim ia ka projek sam um ba 100 klur ha Tura

Syllad | The Rising MeghalayaFebruary 17, 2024

U Myntri Rangbah ka Jylla u Conrad K Sangma haka 17 tarik Rymphang u la ong ba ka jylla ka donkam ban kynjoh ia ka 11.5 percent ka jingkiew ha ka GDP ha ka shi snem khnang ban poi sha ka thong ka jingkiew kaba 10 billion US dollar ha ka ioh ka kot kumba la angnud kat haduh u snem 2028.

“Kumba ka long mynta ka ioh ka kot ka jylla ka long 45,000 klur ia kaba donkam ban nangkyntiew shuh shuh. Ka dei ka thong kaba Shem shitom hynrei kum ka sorkar ngi la pynkhreh ia ki sienjam ban kynjoh sha katei ka thong,” ula ong haba plie iaka projek sam um Bulk Water Supply Project kaba 100 klur ha Ballonggre, Tura.

Ia une u Mawnongrim na ka bynta kane ka projek ban pynioh um sha ki thain nongkyndong kiba Marjan jong ka sor Tura la pynieng ha ryngkat ka jingiadon lang u Lamphang ka iingdorbar thawain u Thomas Sangma, u Myntri ka Tnat PHE u Marcuise Marak bad ka MP ka Lok Sabha ka Agatha K Sangma.

Kane ka projek sam um ha Tura la bei tyngka da ka Ministry of DoNER kaba hap hapoh jong ka North East Special Infrastructure Development Scheme (NESIDS). Hadien ba la pyndep ia kane ka projek, kane kan pynbiang um sha kumba 41 tylli ki shnong kiba hap hapoh Rongram, Rerapara bad Gambegre block jong ka West bad South West Garo Hills district.Nalor kata kan kyntiew ruh ia ka jingpynioh um sha ki jaka sor ha Tura.

Kumba ka long mynta kine ki shnong ki hap ban shaniah ia ka jingpynioh um lyngba ka Tura Urban Water Supply Scheme.Kane ka projek sam um bathymmai kan dei kaba la tip kum ka pumping scheme lyngba ka wah Ganol, bad kane ka scheme ka kynthup ia ka jingshna ia ki iing ban buh ia ki tiar pump um, ka jingtei ia ki jaka pynlang um, ki kor pynkhuid um, ki tiar pump um, ki quarter na ka bynta ki staff bad kiwei kiwei.

U Conrad u la ong ruh ba na ka liang ka sorkar ka don ia ka thong bad ka jingiohi jngai na ka bynta ka jylla bad kyntiew ia ka jingbhah tyngka na ka bynta ki jingtei ki ban neh slem, ka jing thaw ia ki lad ioh jam ioh jam lyngba ki jingseng kam lajong nalor ka jingpyntreikam ia ki polisi bad prokram ba kyrpang ban kyntiew ia ka ioh ka kot jong ki nongrep.

Nalor kata haba pynpaw halor ka jingbym lah ban lehbha ka jylla ha kiba bun ki bynta jong ki jingtreikam u CM u la ong ba ha ki san snem kiba la leit, ka sorkar MDA kala lah ban shimkhia ha kaba iadei bad kiba bun ki jingeh.

U la ong ba ka Meghalaya mynta ka la jam shakhmat bad ioh ruh ka jingithuh kum ka jylla kaba lah ban pyntreikam bha ia ki skhim bapher bapher ka sorkar pdeng, kata kynthup ia ka PMGSY, PMAY, JJM, MGNREGS bad ioh pdiang ruh ia ki khusnam bad ki jingiarap pisa.

“Shwa ka snem 2019, ka Tnat PHE ka don ia ka mang tyngka kaba tang hapoh ka 50 klur.Mynta ka mang tyngka ka la kiew shaduh ka T.3000 klur, bad ka jingpynleit jingmut ka long ban shna ia ki jingtei kiba bha bad kiba neh khnang ban lah ban ialeh pyrshah ia kiba bun ki jingeh kiba iadei bad ka jingpynioh ia ka umbam um dih,” ong u CM haba pyntip ruh ha kaba iadei bad ka State Water Policy nalor kiwei pat ki skhim ban lah ban ialeh pyrshah halor ka jingsngewkhia lyngba ki jingkylla ha ka jinglong jingman ka suinbneng.

Shuh shuh haba plie ia ka MegARISE ha Tura, ka projek kaba pynleit jingmut na ka bynta ban aijingiada ia ki jaka kiba don ia ki tyllong um ha ka jylla, u Conrad ula ong “Kane ka projek ka pynleit jingmut na ka bynta ban aijingiada ia ki tyllong um jong ka Wah Umiew ha East Khasi Hills District bad ia ka Wah Ganol ha West Garo Hills. Kine ki jaka ki long kum ki lad ai jingim ia ki artylli ki sorbah kiba bun briew tam, kata ka nongbah Shillong bad Tura.

U CM u la ong ruh ba ka sorkar jylla ka la iatreilang bad ka KfW (German Development Bank) na ka bynta ban pyntreikam ia katei ka projek ka ban ai jingmyntoi ia ki 106 tylli ki shnong kiba don hajan jong ki jaka kiba don ia ki tyllong um.Ia kane ka projek yn pyntreikam na ka bynta 7 snem bad ba ka jingbhah tyngka kan kot sha kumba 344 klur ia kaba yn pyntreikam da ka Meghalaya Basin Development Authority (MBDA).