Pynpaw u CM ba ka jingkhuid ka lyer ha Byrnihat ka la kham biang, kam pat ju hiar ha ka kyrdan kaba sniew

Syllad | The Rising MeghalayaFebruary 20, 2024

U Myntri Rangbah ka Jylla, u Conrad K Sangma haka 19 tarik Rymphang, u la ong ba katkum ka jingioh lum jingkhein bad ki jingtip ba thikna, ka jingkhuid jong ka lyer hapoh Byrnihat, Ri Bhoi District ka la long kaba kham biang bad kam pat ju hiar satia ha ka kyrdan kaba sniew lane ka ban kham sniew shuh shuh.

“Wat hapdeng kane ka jingioh khubor ia ka jingbiang ha ka jingkhuid jong ka lyer, hynrei ngim shym la shim sting satia ha kaba iadei bad kane ka mat,” ong u CM haba jubab ia ka jingkhot da u nongmihkhmat ka Jirang u Bah Sosthenes Sohtun hapoh ka iingdorbar Assembly na ka bynta ban buh ia ka ophis ka MSPCB ha Byrnihat.

U la ong ba ka Byrnihat ka don marsyndah eh bad ka Assam bad ki don shibun bah ki karkhana sha baroh arliang.

Na ka liang u CM u pyntip ba ka Meghalaya State Pollution Control Board (MSPCB) ka la buh ia ki kor ki bor ka ban ai jingtip mar mar ha kaba iadei bad ka jinglong jingman jong ka lyer man la ka sngi. Namar kata watla ngim buh ia ka Tnat ophis jong ka MSPCB kane ka kor treikam ne technology kan don ha kane ka jaka ban jurip ia ka jinglong jingman jong ka lyer, ong u Conrad.

Nalor kata u CM u la ong ruh ba ka Board kan pyndonkam ruh ia ka kor jingstad na ka bynta ban jurip bniah ha kaba iadei bad ka jingkhuid jong ka um.

Halor kane u la ong ba ka sorkar jylla ka la iakren ruh bad ka Assam na ka bynta ban iatreilang ha kaba iadei bad kane ka phang.