Pynpaw u CM ba ka sorkar Jylla ka trei ruh na ka bynta ban kyntiew ia ki riew paidbah

Syllad | The Rising MeghalayaDecember 12, 2023

U Myntri Rangbah ka jylla, u Conrad Sangma haba plie ia ka Albera Home Youth Development Centre ha St. Paul’s Parish, Upper Shillong haka 10 tarik Nohprah (Sngi U Blei), u la ong ba ka sorkar Meghalaya kam shym pyntreikam tang ia ki skhim bad ki projek bapher bapher, hynrei ka trei ruh na ka bynta ban kyntiew ia ka ioh ka kot bad ka bha ka miat jong ki riew paidbah.

U la ong ba ia ki skim la buh ha ki riew paidbah khamtam ha ki samla khnang ba kin lah ban pyntreikam ia ki. Haba aijingiaroh ia ki bynta ba la shim da ka Youth Centre ban wanrah ki prokram bapher bapher na ka bynta ki khun samla, u CM u la kyrpad bad kyntu ia ki nongpyniaid ka ‘Centre” ban pynmih ia ki ha ki rukom ka jngbuh jingthoh jong kine kiei kiei baroh wat lada ka jingshakri jong ka long tang 50% khnang ba kan long ka nuksa kaba bha ia kiwei pat.

Nalor kata u la pynpaw ruh ba bun ki skhim bad ki project jong ka sorkar Meghalaya na ka bynta ki khun Samla, kum ka ‘Yess Meghalaya’, da kaba u kren bynniaw ruh ba bun na ki briew kim tip shaphang kine ki skhim bapher bapher ba la ai da ka sorkar. U la bynrap ba ia ki khun samla la khot ba kin long nongaibuit ai bor bad ki jingkyrshan ia ka lawei bad ka dei ka kamram jong ki nongialam shnong, ki nongialam niam, bad kumjuh ruh ki nongialam sain pyrthei ban kyrshan ia ki khun samla ha ka rukom kaba tei ia ki.

Kane ka Youth Centre ka hap hapoh ka jingpyniaid jong ka St. Gabriel’s Outreach lyngba ka Alumni lane ka seng ki khynnah skul barim jong ka skul St. Gabriel Hr. Sec. School,  Laimer Upper Shillong hapoh ka jingpeit jingkhmih jong i Rev. Fr. Tobias K.Kynta, uba long ruh u Parish Priest jong ka St. Paul’s Parish. Ia kane ka jingtei ia ka Youth Centre lah bei tyngka na ka Chief Minister Special Development Fund (CMSDF).

Naduh ba la sdang ia ka ha u Lber 2023, ka Youth Centre ka la sdang ia ka skul miet ne evening school na ka bynta ki khynnah khynnah kiba duna ha ka ioh ka kot lyngba ka NIOS na ka bynta ki class 10 bad 12. Ka Centre ka la sdang ruh ia ka shlem jingkynpham Mynsiem (Guidance and Counselling) khamtam ia kito ki khynnah samla kiba ngat ha u drok bad ka kyiad.

Nalor kata kane ka Centre ruh kan sa sdang ruh ia ki jinghikai bapher bapher khamtam lei lei na ka bynta kito kiba kwah ban sdang ki kam ki jam lajong ryngkat lang bad kiwei ki course kum ka computer, music, sports bad kiwei kiwei.

Kiwei pat kiba la kren ha ka jingialang ki  kynthup ia u Bah Wanjop Laloo, Director, Albera Home & Youth Development Centre & U Fr. Tobias K.kynta.

Ia ka program la pyniaid da u Bah John Jarain, Vice Principal St. Gabriel’s Hr. Secondary School. Kiwei pat  kiba lah iadon lang ha kane ka sngi kynthup ia i Dr. Ampareen Lyngdoh, myntri ka Tnat ka koit ka khiah bad ka rep ka riang, u Bah Ronnie V Lyngdoh MLA/MDC  uba long ruh u nongialam ka liang pyrshah, u Bah Daniel Thangkhiew, OSD jong u Myntri Rangbah, U Fr. Sylvanus Nongkynrih, u Fr Genesimus Nongneng kiba long ki Assistant Parish Priest, Fr. V.T Jose novice Master Sunnyside, Fr. Augustine Warbah, Rector ka St. Paul Seminary, Fr Devasia na Siloam, Umbir,ha ryngkat ka jingiadon lang ki riewniam kynthei, ki dkhot ka Parish Pastoral Council, bad ki dkhot ka Seng Longkpa, Seng Kynthei & Seng Samla bad kiwei pat ki samla kiba la poi palat 500 ngut.

Ia ka Youth Centre la kyrkhu ruh da  u Fr. VT Jose. Ia kane ka sngi la pynphuh pynphieng da ki sur rwai bad shad na ki khynnah jong ka Centre.