Pynpaw u CM ba ka Union Civil Code kam dei satia ka mat jong ka Sorkar MDA

Syllad | The Rising MeghalayaJanuary 31, 2025

U Myntri Rangbah ka Jylla u Conrad K Sangma ha ka 30 tarik Kyllalyngkot u la ong ba ka jingpyntreikam ia ka Uniform Civil Code (UCC) kam dei satia ka mat ne agenda jong ka sorkar Meghalaya Democratic Alliance (MDA) namar ka jylla ka don la ki jong ki riti ki dustur kiba iapher na kiwei pat ki jaidbynriew.

“Ngi burom ia ka jinglong kyrpang jong ki jaidbynriew bapher bapher jong ngi bad ngi pynpaw shai ba ka jingiada ia kine ki jingleh jingkam tynrai jong ki nongshong shnong bapher bapher dei ban burom,” ong u Conrad haba kren sha ki lad pathai khubor.

Haba pynskhem halor ka jingdonkam ban sngewthuh halor ka UCC, u CM u la ong, “Ha ka ki don ar bynta, kawei ka dei ka jingmut hi kum ka ain paidbah kaba mar ryngkat bad kum ka bill ne act kaba batai kaei kata ka jinglong kaba mar ryngkat bad kaei ka bym long mar ia ryngkat.”

Kumta ruh u la ong ba kine ki long kiei kiei kiba iapher kiba dei ban peit bniah. Phim lah ban buh lang ia ki baroh ar. Balei? Namar ka UCC kum ka jingmut ban pynthikna ba baroh kin long kiba ia ryngkat kam lah ban long ha India namar ki don ki nongshong shnong kiba dei ki jaidbynriew riewlum bad kiwei kwei pat ki jaidbynriew bapher bapher kiba don ia la ki jong ki rukom treikam bad kiba lah ban ym iahap bad kiwei pat ki jaidbynriew.”

U CM u la  pynpaw ruh ha kaba iadei bad ka Uttarakhand kaba la long ka jylla kaba nyngkong ban pyntreikam ia ka UCC hynrei kam shym la kynthup satia ia jingleh jingkam tynrai jong ki trai shnong riewlum.