Pynpaw u CM  ba shen yn sdang pura ka jingpyntrei ia ka surok Shillong-Dawki

Syllad | The Rising MeghalayaDecember 14, 2023

U Myntri Rangbah ka Jylla u Conrad K Sangma haka 13 tarik Risaw u la ong ba shen ka jingpyntrei ia ka surok Shillong-Dawki kaba la sahteng kan sa sdang pura.

Haba kren sha ki lad pathai khubor, u CM u la ong ba dang shen ka Tnat National Highways and Infrastructure Development Corporation Limited (NHIDCL) ka la bhah ia ka kam ha ki ar lai bynta sha ki kontraktor kiba thymmai na ka bynta ban pyntrei ia kane ka projek.

“Ngi la pynlong ia ka jingialang bishar kam ha ryngkat ki kontraktor kiba thymmai dang ha kine ki 10-15 sngi ba la dep bad ka jingmut ka long ban shu khmih shwa halor ki jingpynkhreh ki jong ki bad ban ai ia ka jingmynjur namar kane ka dei ka por bad ka aiom trei bad kumta ki dei ban leh ia baroh kiba ki lah ban leh ban pynkloi ban ioh sdang bad ban pyndep noh hapoh ki hynriew bnai ki ban wan,” ong u Conrad.

“Ngi ioh ia ka jubab kaba biang na ki bad ngi khmih lynti ba shen yn pynkhreh noh ia ki mashin bad ki nongtrei khnang ban lah ban sdang pura ban pyntrei noh shen ia baroh kine ki bynta jong ka surok,” u la ong.

Halor ka jingkylli, u Sangma u la ong ba ki don katto katne ki daw kiba la pynlong ia ki kontraktor kiba hashwa ba kin pynkut noh ia kane ka jingiateh.

“Kim shym la don ki juh ki daw halor ka ki jingpyntrei ia ki bynta bapher bapher jong kane ka surok. Ha ki katto katne ki jaka ngi iakynduh jingeh ban ioh ia ka jingbit na ka Tnat Forest, ha ki katto katne ki jaka ngi iakynduh jingeh halor ka jingpynkynriah ia ki jingwit jingwoh kiba don ha ki lynti, ha ki katto katne jaka ka jingeh halor ka jingioh jaka, bad ngi iakynduh jingeh ruh bad ki katto katne ki nongshong shnong ha kaba ki don ki jingpyrshah na ki katto katne ki nongshong shnong bad ki kynhun,” ong u CM.

Shuh shuh u CM u la ong ba ka jingeh kaba khraw tam ha kaba iadei bad ka jingthmu ban pyniaid shakhmat ia kane ka projek ka dei halor ki jaka puta.

Watla katta u la ong, “Ngi sngewkmen shibun ba ngi la trei shitom, ki heh sorkar ba dei khmih ki la trei shitom ha kaba ngi la lah ban weng ia kiba bun na ki jingeh, bad Nga kyrmen bad kane ka projek surok Shillong-Dawki ka dei ban sdang noh shen.”

Katkum ka jingpynpaw jong u CM kine kane ka jingpyntrei ia kane ka projek ka don la ki jong ki bynta ba la buh katkum ka por  na ka bynta ban pyndep ia ki.