Pynpaw u CM ia ka jingsngew skhem ba ka NPP kan jop ha kane ka elekshon MDC ha Rilum Khasi Jaintia
U National President ka NPP bad Myntri Rangbah ka Jylla u Conrad K Sangma ha ka 15 tarik Kyllalyngkot u la pynpaw ia ka jingsngew skhem ba ka party jong u kan ioh ia ka jingjop ha kane ka elekshon sha ki artylli ki Autonomous District Council (ADC) ha Rilum Khasi bad Jaintia ka ban long ha ka 21 tarik u Rymphang.
“Man ki elekshon ki iapher, man ki elekshon ki dei kiba jwat, bad kam mih ka jingkylli ban sngew ba la jop beit. Ngi donkam ban trei shitom bad ngi kyrmen ba kiei kiei kin iaid ha ka lynti kaba dei bad ngin jop ia kane ka elekshon ADC ha KHADC bad JHADC,” ong u Conrad haba kren sha ki lad pathai khubor.
U la pyntip ba ka party NPP ka la pynlong ia ka jingialang bishar kam bad ki kyrtong na ka KHADC bad JHADC bad ong, “Ngi ioh ia ka khubor kaba sngewtynnad. Hynrei ki don beit ki jingeh jingtynjuh bad ngi hap ban trei shitom. Ki kyrtong jong ngi ki la don mynta sha ki shnong ki thaw katba ngi dang iakren hangne. Kumjuh ruh ki nongialam jong ngi ki la pynkhreh ha baroh kawei ka jylla bad ki la trei shitom na ka bynta kane ka elekshon ka ban wan.”
U Conrad u la bynrap ruh ba ki jingpynkhreh na ka liang ka sorkar ka long ba kan shim ia baroh ki sienjam ban pynthikna ba ka jingpynlong ia kane ka elekshon sha baroh ki artylli ki ADC kan long kaba iaid beit iaid ryntih.
Da kaba pdiang ba ki jingsngew pyrshah sorkar ki dei kiei kiei kiba ki sorkar kim lah ban lait, u CM u la ong, “Hynrei haba phi phai sha ki kam kiba la leh da ka EC ba la ialam da ka NPP ha KHADC, shibun ki bill kiba la don, shibun ki mat ba sahteng ki bym shym la leh ei ei ha ki snem kiba la leit noh la lah ban pyndep da kane ka EC kaba mynta. Kumta ym don ba lah ban ong ba ka EC ka la pulom jur ha ki jingtreikam.”
“Ka long kaba shisha ba ki don shibun ki jingeh, shibun ki mat kiba don, hynrei shibun ki kam bad ki project ba kongsan kum ka jingbei tyngka ia ki nongwad bniah (research scholar) ba kin lum jingthoh halor ka kolshor u Khasi, halor ka ktien ka thylliej bad kiwei kiwei la lah ban leh da kane ka EC ka NPP. Kine ki dei ki dak kiba itynnad ba kumno kane ka EC ka treikam ban kyntiew ia ka thain bad ia ka District Council,” u la ong da kaba bynrap, “Ki liang pyrshah ki lah ban ong shibun hynrei ka EC ka la treikam bha bad ka la pyndep ia kiba bun ki mat kiba sahteng, ki dang don shibun ki kam kiba dang sah bad ngin sa bteng ban nangtrei shuh shuh na ki sngi ki snem ki ban dang wan.”
Ha kaba iadei bad ka jingpyrshang ban pyniakhleh ia ka niam bad ka kam sain pyrthei, une u nongialam ba hakhliehduh ka NPP u la ong, “Ngam don ei ei ban ong halor kane, kane ka shong beit ha kita ki seng sain pyrthei halor kumno ki kwah ban leh ia kane, hynrei nga tharai ka imlang sahlang ka kwah ban ym pyniakhleh ia ka niam bad ka kam sain pyrthei.Nga tharai ka imlang sahlang kan sa rai bad ki paidbah kin sa rai hashwa ban leit thep vote.
Facebook
Instagram
Youtube
Twitter
Leave a Reply