Pynpaw u CM ka jylla ba hap ban pynbeit ia ka kam pule puthi ba iaid lait ia ki nongrim mynta la 50 snem

Syllad | The Rising MeghalayaSeptember 13, 2023

U Myntri Rangbah ka Jylla Conrad K Sangma haba aijingkren ha ka jingialang pynhap pyrda ia ka jingrakhe dap 100 snem jong ka Laban Bengali Higher Secondary School haka sngi Balang u la ong ba ka sorkar jong u kan hap ban pynbeit ha kaba iadei bad ka kam pule puthi ha ka jylla ha ka rukom kaba janai hadien ka jingiaid lait noh ia ki nongrim kumba la thmu mynta lah 50 snem kynthih.

Haba ai khublei ia kane ka jingiaid lynti kaba jlan jong kane ka skul bad ia ka jingiohi jngai da ki nongseng jong ka, u CM u la ong ba ka tnat pule puthi ka dei kawei na ki mat ba kongsan eh jong ka sorkar, bad na ka liang ka sorkar ka la pyntreikam ruh ia ki polisi kiba thmu ban khmih na ka bynta ka jingbit pynbiang ki jaka pule ha ka jylla baroh kawei.

Nalor kata haba pynpaw halor ki jingeh kiba iadei bad ka kam pule dangle ha Meghalaya, u Conrad ula ong ba ka jylla ka don ia palat 55000 ngut ki nonghikai bad jan kot 15000 tylli ki skul bad jaka pule. U la ong ba ki  jingeh ban pyniaid ia ki skul ha ryngkat ka jingbym biang tarajur halor ka jingdon ki onghikai bad ki khynnah ka dei kawei na ki jingeh kiba don ha ka kam pule dangle ha Jylla.

Kumta ruh u la ong ba kine ki jinglong jingman ki pynbor ia ka Sorkar ban hap shim ia ka rai ba tyngeh ha kaban pyniasnoh lang noh lane khang noh ia ki jaka pule ki bym treikam. “Ha kine ki san hynriew snem ba la dep ka la don ka jingkylla ha ka tnat pule puthi kiba thmu na ka bynta ka bha ka miat jong ki khynnah pule.Ia ki jingiarap pisa ka sorkar kiba thmu na ka bynta ka pule puthi la ju pyndonkasm bakla, hynrei mynta ngi la hukum ia ki ban kyntiew ia ki jaka pule hapoh ki skul sorkar,” ong u Conrad Sangma uba pynpaw ruh ka jingsngewkhia halor ka jingdon jong kiba bun ki skul kiba duna ka jingdon ki khynnah wat hadien bun bun snem bad halor ka jingbym don ki khynnah kiba pass ha ki eksam matrik.

Une u Myntri u la ong ruh ba ka pisa bala lum na ka bynta ka pule ka dangle kala nangkiew ha ka jingbym pyndonkam tad haduh u snem 2019 bad bynrap ba kane ka Sorkar ba mynta kala bthah ban pyndonkam ia kane ka pisa bala lum ha ka dur jong ki khajna na ka bynta ban maramot bad shna ia ki jaka pule ki ban pynmyntoi  ia ki skul Sorkar ha kylleng  ka Jylla.

Haba kren shaphang ki khynnah ha kane ka jingialang ha ryngkat ka jingiadon lang u Myntri ka tnat pule puthi u Rakkam A Sangma u CM u la kyntu jur ia ki khynnah ba kin long kiba trei minot, ban don ia ka discipline bad ban long kiba bat ia ka por namar ka por ka dei ka spah bah kaba kongsan ha ka jingim jong ki briew.

Shuh shuh haba kren halor ka mat kaba iadei bad ka NEP-2020, u CM u la batai bniah bha halor ka jingdokam jong ki kolej na ka bynta ki jingpule bapher bapher bad ruh na ka bynta ban thung shuh shuh ia ki nonghikai bad ki jaka pule ha kaba ki jingdonkam baroh kin kot sha ka T.400-500 klur.

Hashwa kane u CM ula pynkup burom ia ki khynnah ka skul kiba wan shakhmat eh ha ki eksam ka MBOSE bad pyllait ruh ia ka souvenir jong ka jingrakhe jubilee bad ka kot bala pynbit pynbiang da u President ka Managing Committee jong ka skul.