Pynpaw u CM ka jylla ba hap ban pyniaid shakhmat ia ka NEP

Syllad | The Rising MeghalayaAugust 2, 2023

U Myntri Rangbah ka Jylla, u Conrad K Sangma u la ong ba kin hap ban iaid shakhmat ban pyntreikam ia ka National Education Policy (NEP) ha ka jylla halor ki jingshisha ba kane kan long kaba myntoi na ka bynta ki samla pule.

Haba kren sha ki lad pathai khubor mynta ka sngi Balang, u CM u la ong ym don satia kiba pyrshah ia ka NEP. Watla kin don ki jingeh ha kaba iadei bad ka jingdon ki nongtrei bad ki jingtei hynrei barabor ki don beit ki jingeh na ka bynta ban wanrah ia kano kano ka jingkylla.

U la ong ruh ba na ka liang ka sorkar ka la shim ia baroh ki sienjam kiba donkam na ka bynta ban pyntreikam ia ka NEP ha baroh ki kolej sorkar. Ha kaba iadei bad ki kolej deficit, u la ong ba ia kine la pyniaid da ki management committee lyngba ka jingkyrshan jong ka sorkar na ka liang ka sorkar hi kan dang iai bteng ban ai ka jingkyrshan watla ym lah ban pynthikna ban leh lut ia baroh.U la ong ruh ba na ka liang ki MC ruh ruh kin hap ban iatreilang bad ka Sorkar ban lah pyntreikam ia kane.       

Da kaba pynkynmaw ba ki don ki kolej bapher bapher ha ka jylla, u CM u la ong ba ia ki kolej ba la pyniaid da ka sorkar na ka liang ka sorkar hi kan hap ban leh ia ki jingdonkam baroh. U la ong ruh ba na ka liang ka tnat pule puthi kan iamir jingmut lang bad ki bor pyniaid ka NEHU ha kaba iadei bad ki kolej kiba don ka jingiateh bad ka NEHU ia kiba donkam ban pyntreikam ia ka NEP.

Shuh shuh u la ong ba ha ka jingiohi ka jong u ba kam don kano kano ka jingpyrshah ban pyntreikam ia ka NEP bad baroh ki tip ba kane ka dei na ka bynta ka jingbha bad baroh ki mynjur ba kane ka dei ban treikam watla kin don shibun ki jingeh.