Pynpaw u CM ka jylla ia ka jingangnud ban pyniasoh ia ka NE bad ki ri ba marjan ban pynsuk bad kyntiew ia ka khaii pateng

Syllad | The Rising MeghalayaNovember 23, 2023

U Myntri Rangbah ka Jylla, u Conrad K Sangma haka sngi Balang u la pynpaw ia ka jingangnud ban pyniasoh ia ka thain shatei lammihngi (Northeast) jong ka ri India bad ki ri ka thain Asia ba marjan khnang ban pynsuk bad ban kyntiew ia ka kam khaii pateng.

Ia kane u Conrad u la pynpaw haba kren ha ka jingplie ia ka United Nations Economic and Social Commission for Asia and the Pacific (UNESCAP) Subregional Capacity Building Workshop for Bangladesh, Bhutan, India and Nepal (BBIN) Connectivity ha ka jingialang ba la pynlong ha Taj Vivanta ha ka nongbah Shillong.

U la ong ba katkum ka histori ka ithuh ba ki don shibun bah ki kam khaii pateng hapdeng kine ki thain hashwa jong ka jingioh laitluid, bad ka don ruh ka kabu ha ki kam khaii bad ka jingpyniasoh ha kane ka thain, kumta donkam ban pynbeit pat ia baroh kine ki jingeh kiba la khanglad bad pynsangeh ia ki kam khaii pateng bad ka jingpyniasoh.

U CM u pyntip ruh ba lada ka thain shatei lammihngi kan iaid bad kiew shakhmat, kane kan noh synniang ruh halor ka thong jong ka ri ban kyntiew ia ka ioh ka kot jong ka ri hi baroh kawei.U la ong ba kane ka dei kawei na ki mat kiba kongsan jong ka sorkar.

Na ka liang ka jong u, u la pynpaw ba u la aijingmut naduh kaba sdang ba ia ka Act East Policy ym dei ban shim ne khein kyllum lang ia baroh, kata da kaba pynpaw halor ka jingdonkam ban don la ki jong ki zone khnang ban lah ban pyniaid shakhmat ia kane ka Policy.

Shuh shuh u la ban ruh ba na ka liang ka sorkar jylla ka don ia ka jingangnud ban shim kabu halor ka jinglong ki jaka puta na ka bynta ban kyntiew ia ki kam khaii pateng bad ka jingpyniasoh.U la pynpaw ruh halor ka jingdonkam ban pynjynsur ia ki policy khnang ba ki paidbah kin ym mad jingeh ha kaba pyniaid shakhmat ia ki kam khaii pateng bad ban pyndonkam ia ki jingtei kum ki Check Posts, ka jingpyniasoh lyngba ki surok kiba bha sha ki thain khappud kum ki lad ki lynti ki ban wanrah ia shibun ki jingkylla.

“Nga ngeit ba kane ka prokram ka dei tang kaba sdang na kiba bun bah ki jingkylla kiba khraw ia kiba yn pyntreikam nangne shakhmat,” ong shuh shuh u CM.

Ha kane ka prokram la ioh ruh ka jingkren na ka Director, South bad Southwest Asia Sub-Regional Office ka Mikiko Tanaka nalor kiwei kiwei pat.