Pynpaw u Dy.CM ia ki kam radbah ka Sorkar NPP, ka VPP ka dei ban kylli ruh nangno ka Sorkar ka pynioh haduh 38,000 klur ki kam pynroi

Syllad | The Rising MeghalayaFebruary 12, 2025

U President ka National People’s Party (NPP) ka Jylla bad Symbud Myntri Rangbah, u Bah Prestone Tynsong u la kyntu ia ki liang pyrshah khamtam ia ka Voice of the People Party (VPP) ba ki dei ban wad ruh nangno ka sorkar ba la ialam da ka NPP ka ioh ia ka song pisa kaba haduh T.38,000 klur ban pynthikna halor baroh ki kam pynroi ha ka Jylla.

Haba kren ha ka rynsan ialap elekshon ha shnong Umthli ban pan jingkyrshan ia u kyrtong ka NPP na Langkyrdem-Laitkroh u Bah Rahboklang Tynsong ha ka miet sngi Nyngkong ba la lah, u Bah Prestone u la ong, “Ki la kynnoh laiphew jait laiphew rukom pyrshah ia u Bah Prestone bad ia u Conrad Sangma, hynrei nga kwah ban aijingmut ia ki ba kin kynnoh ruh ba nangno ka NPP, u Prestone bad u Conrad ki la lute ia kat ia kane ka pisa na ka bynta ban wanrah ia ki kam pynroi ha Meghalaya.”

U la ong, “Naduh ka sngi ba ngi la shimti ia ka sorkar ha Meghalaya, ngi la lah ban wanrah ym duna ia ka T.38,000 klur ban pynthikna na ka bynta baroh ki kam pynroi lyngba ki Tnad bapher bapher ka sorkar na ka bynta ka bit ka biang jong ki paidbah nongshong shnong ka Jylla. Hynrei, ka long kaba sngewsih ban iohi ba ki manifesto jong kiwei pat ki party sain pyrthei, khamtam ka party thymmai (VPP) kaba la shu kynthoh pyrshah ia ki kam ba bha jong ka sorkar.”

U Bah Prestone u la kular ruh ba ka party jong u kan shim ia ki sienjam kiba donkam na ka bynta ban pynkhlain shuh shuh ia ki Autonomous District Council (ADC) bad ban pynkup bor ia ki Khlieh Nongsynshar Shnong bad ki Dorbar Shnong lada kan shah jied ban wanphai biang ha ka bor ha kane ka elekshon ADC ka ban long ha ka 21 tarik Rymphang.

“Ngi kwah ban nangpynkhlain ia ki riti dustur ba riewspah jong ki paid riewlum, ki hok halor ka khyndew ka shyiap bad ka synshar shnong synshar Hima da kaba pynkupbor ia ki It ki Hima bad ki Dorbar Shnong. Hynrei, ka long kaba sngew bynniaw ban iohi bad iohsngew ba don kiba byrngem ban mudui ejahar pyrshah ia ki nongialam shnong (kaba dei ka jingthmu ban pyntlot ia ki), hynrei nga ong ha phi ba wat ka ECI ka la ai bor bad ithuh ia ki Dorbar Shnong ha ka por jong ka elekshon,” u la ong.

Nalor kata u Bah Tynsong u la buh jingkylli ruh ia ka jingpyrshang ban pyntlot ia ka riti aijait kmie da kiwei pat ki seng sain pyrthei, khamtam kito kiba pynshlur ia ki briew ba kin shim jait na u kpa. Kaei ka ban jia ia ka pateng ka jong ngi lada ngin ailad ia kane?”

“Kumta nga kyntu jur ia ki paidbah ba kim dei ban shah ialam bakla bad ba ki paidbah kim dei ban ailad ban pyntroin ia ka riti dustur ba riewspah jong ngi,” u la bynrap.

U Bah Tynsong u la kam ruh ba ka sorkar ba ialam da ka NPP ha ryngkat ka Executive Committee ha KHADC ka la mynjur ia ka Land Act ka ban iada ia ki hok halor ka khyndew ka shyiap jong ki trai ri trai muluk bad ong, “Ngi kwah ban nangpynkhlain shuh shuh ia kane ka Act.”

U la ong ruh, “Ki la don ki jingpyrshang ban ialam bakla ia u paidbah hynrei ka NPP ka la shimkhia bha ia kane ka kam. Wat hapdeng ki jingkynnoh pyrshah ia ka NPP, hynrei ngi la nangkhlain. Ngi la lah ban ioh ia ka sorkar kaba skhem. Hashwa jong u 2018, ki jingjia pynkhyllem Sorkar ki jur bha ha ka Jylla. Hynrei, naduh ba ka NPP ka la shimti ia ka sorkar, ka phang kaba iadei bad ki kam pynkhyllem sorkar ki la jah rngai noh.” U la ong ba kane ka dei namar kam don satia kano kano ka jingiakynad ne ka jingiapher jingmut hapoh ka party NPP, kata ym kumba long ha kiwei pat ki seng sain pyrthei khamtam ka seng VPP kaba don ka jingiapait iapra hapdeng ki MLA bad kaba lam sha ka jingbym iasngewthuh jingmut ha ka rukom ai tiket na ka bynta kane ka elekshon MDC.

Une u nongialam ka NPP u la pynpaw ruh halor ka jingmih jong ki seng sain pyrthei kum ki tit bad kaba la nang pynpait pynpra shuh shuh ia ki paidbah ka Jylla.

Ha kajuh ka por u Symbud Myntri Rangbah u la ong ba ka sorkar Jylla ka la pynthikna ban ai kam sorkar ia ki laingut ki nongialehkai kiba dang shu ioh khur takma bad wanrah nam ia ka jylla na ka ‘38th National Games.’

“Ngi pynshlur ia ki samla ba kin kiew ha ki kam ialehkai sports. Hynrei, ki la don pat ki party kiba kam ba lada kyrshan ia ki, kin ai kam ia phi, hynrei nga ong ba wat ju ngeit ia ki namar ki shu pynbiej kai ia phi,” u la ong.

Shuh shuh u la ong ba ka sorkar ka la pynleit jingmut ban pynkhlain shuh shuh ia ki SHG ban pynkupbor ia ki kynthei.U la bynrap ruh ba ka jingdon jong ki SHG ka la kiew na ka 5000 sha ka 50,000 tang ha kine ki hynniew snem kiba la dep.