Pynpaw u Lamphang ba um don jingtip ba sospon ka Congress ia ki MLA ba iasoh NPP

Syllad | The Rising MeghalayaAugust 24, 2024

U Lamphang ka Iingdorbar Thaw Ain u Thomas A Sangma ha ka 23 tarik Nailar u la  pynpaw ba um don jingtip satia ha kaba iadei bad ka rai jong ka Congress ban sospon haduh 6 snem  ia ki 2 ngut ki MLA kiba la leit pyniasoh dang shen sha ka National People’s party (NPP).

“Ngam don jingtip ia kane ka jingsospon kaba 6 snem.Ngam tip ia kaei phi iakren,” ong u Lamphang haba kren sha ki lad pathai khubor haba jubab ia k jingkylli halor ka rai jong ka Congress ban mudui pyrshah ia ka hukum ba la ai jingithuh ia ka jingwan pyniasoh jong ki laingut ki MLA ka Congress sha ka NPP halor k nongrim ba arngut na ki, ki dei ki MLA ba la shah sospon..

U Bah Gabriel Wahlang (Nongstoin constituency) bad u Bah Charles Marngar (Mawhati constituency) ki la shah sospon haduh hynriew snem hashuwa ba ma ki ryngkat u Dr Celestine Lyngdoh (Umsning Constituency) kin leit ban pyniasoh sha ka NPP ha ka 19 tarik mynta u bnai.

Nalor kata u Lamphang u la ong ruh, “Ngam pat shym la ioh satia ia ka hukum ba la sospon (ba la ai da ka Congress party) kat haduh mynta. Phim lah ban khmih lynti ia nga ba ngan shim ia ka rai da kaba pynshong nongrim halor kaei kaba la mih lyngba ki lad pathai khubor.”

Haba kylli u Sangma u la ong ba u la ithuh ia kane ka jingwan pyniasoh hadien ka jingkhmih bad bishar bniah ia baroh ki kyndon ain.  

“Nga la shim ia ka rai da kaba pynshong nongrim ia baroh ki ain. Nga la bishar bniah bad nga la shem ha ki hukum bad kumta ruh nga la shim rai ban shah ia ki ba kin wan pyniasoh sha ka NPP” ula ong da kaba  bynrap “Kala paw shai ia ka jingdon ar na ka lai bynta. Ka Riti Synshar ka ong ba haba ar na ka lai bynta jong kino kino ki seng sain pyrthei ki rai ban iasoh, kane ka jingiasoh ka lah ban jia”.