Pynpaw u Lat halor ka thong ka sorkar Jylla ban kynjoh sha ka 10 billion US dollar ha ioh ka kot kat haduh u 2028

Syllad | The Rising MeghalayaFebruary 16, 2024

U Lat ka Jylla u Phagu Chauhan haba kren ha ka sngi sdang ka Dorbar Mang Tyngka haka 16 tarik Rymphang, u la pynsngew ba sorkar Jylla ka la buh ia ka thong ban kynjoh sha ka 10 billion US dollar ha ka ioh ka kot kat haduh u snem 2028, kata ka ban kyntiew arshah ia ka GDP jong ka jylla.

“Ki jingtreikam kum ka jingkyntiew ia ki jingtei, ka bording ilekshon, ka jingpynpoi um, ka jingkyntiew ia ki kam bei tyngka, IT, tourism bad ka rep ka rang kin lah ban kyntiew ia ka ioh ka kot kiba kongsan na ka bynta ban kynjoh sha katei ka thong,” ong u Chauhan haba kren ha ka sngi kaba nyngkong jong ka Dorbar Mang Tyngka hapoh ka iingdorbar Assembly.

Haba kdew halor ki polisi treikam jong ka sorkar MDA, u Lat u la ong  ba ka sorkar jylla ka don ia ka thong ban kyntiew arshah ia ka ioh ka kot jong ki nongrep da kaba shim kabu ha kaba iadei bad ka jingbiang ha ka jinglong jingman jong ka mariang bad halor ki sienjam ban pynkhlain halor ka jingpynmih ia ki mar rep kiba bunjait.

Halor kane, u la ong ba na ka liang ka sorkar kam phaikhmat kyrpang ruh ha kaba iadei bad ka jingpynmih ia ki mar rep kiba kongsan kum u shynrai, sying, Sohniamtra, Sohtrun, ki kynbat, ki musli musla bad ka jingpynmih ia ka umngap.Hapoh jong kane ka thong na ka liang ki nongrep ki la ioh pdiang ia ki tiar ki tar kiban iarap ha ka rukom rep rukom riang, ki jingai jinghikai, ki jaka pynmih ia ki mar rep bad ki jingpyniasoh sha ki iew ki hat.Haduh mynta kine kine ki sienjam ki la iarap ia kumba 13 lakh ngut ki nongrep ba kin kyntiew ia ka ioh ka kot ka jong ki.

U la ong ruh ba ka sorkar jylla ka la kyrshan borbah ban kyntiew ia ka kam ri jingri khnang ban kyntiew ia ka ioh ka kot ha ki thain nongkyndong bad ban kyntiew ia ka jingpynmih dud bad doh.

Nalor kata u la ong ba ka sorkar jylla ka la ai ruh ia ka subsidy kaba haduh 50% na ka bynta ka kam ri sniang, blang bad kiwei pat ki jait jingri lyngba ki jingkyrshan pisa kiba hap hapoh ka CM-Elevate program. Lyngba ka Piggery Mission la lah ban thaw haduh 367 tylli ki cooperative society kiba la ri mynta palat 6000 tylli ki sniang pynkha khun.Ki la don ruh palat 1000 ngut ki nongrep kiba la ioh ia ki ram ki bym donkam sut lyngba ka Meghalaya Milk Mission.

Da kaba pynpaw ba ka jingpynmih dohkha ha ka jylla ka la kiew da 1,139 metric ton ha u snem 2023, bad kaba la kiew mynta sha ka 19,374 metric ton, u Lat u la ong ba ka sorkar jylla ka la shim shuh shuh ia ki sienjam ban pynduna ia ka jingpynpoi dohkha kaba na shabar da kaba pyndonkam ia ki sienjam kum ka Recirculatory Aquaculture System bad Integrated Cage Culture. Ia ki jaka aijinghikai ban kyntiew bad pynbha ia ka rukom ri dohkha bad ia ki jingpyntbit la buh ha ki bynta bapher bapher k jylla da ka jingkyrshan na ka NABARD.

Ha kaba iadei bad ka koit ka khiah, u Chauhan u la ong ba ka la don ka jingkiew ha ka jingshakri halor ka koit ka khiah ha k jylla naduh kine ki khyndiat snem ba la dep.Ka jylla ka la sakhi ruh halor ka jinghiar kaba haduh 50% ka jingkhlad jong ki longkmie ha ka por kha khunlung, kata hadien ka jingpyntreikam jong ka sorkar ia ka Chief Minister’s Safe Motherhood Scheme.

U la ong ruh ba ka sorkar ka la lah ruh ban kyntiew ha ka liang ka jingpynbiang ia ki jaka sumar lyngba ki bording na ka sngi ne solar energy ha kaba haduh jan kumba 400 tylli ki sub centre bad palat 50 tylli ki primary health centre bad kiba bun kiwei pat ki jaka aijingsumar ki la biang ha ka liang ka bording. Kane ka la pynlah ruh ha ka sien kaba nyngkong eh na ka bynta ban pynkha khunlung hapoh ki sub centre.

Nalor kata u la ong ruh ba ka sorkar jylla ka la lah ban kyntiew ha ka jingshakri ha ka liang ka koit ka khiah da kaba kyntiew ia ka jingdon jong ki nongtrei, kata ha kaba ka Medical Recruitment Board ka la lah ban pyndep haduh 47% ki post kiba Duna tang hapoh ka shi snem.Ka sorkar ka la pyllait ruh haduh palat 6 klur tyngka lyngba ki 6,500 tylli ki Village Health Councils khnang ban kyntiew ia ka jingai jingshakri ha liang ka koit ka khiah hapoh ki shnong ki thaw lyngba ka jingiashim bynta lang da ki nongshong shnong.

Haba pynpaw halor ka jingkut jingmut jong ka sorkar ban pynioh ia ka pule puthi kaba biang ha baroh ki bynta, u Lat u la ong ba na ka liang ka sorkar mynta ka la nangkyntiew ha kaba iadei bad ki jingtrei kiba la don lypa ha baroh ki skul hapoh ka jylla.

208 tylli ki Elementary, Secondary bad Higher Secondary school kila iaid ha ka Phase-I. 111 tylli ki skul kin hap hapoh ka Phase-II bad sa 1725 tylli kin hap ha ka Phase-III. Halor ka jingthungkam kaba la sahteng la slem bah ia ki nonghikai skul LP ruh la lah ban pyndep dang shen, kata da kaba bynrap ba haduh 996 ngut ki nonghikai ba dang thungkam thymmai kila ioh ia ki shithi thungkam ha ka prokram ba la pynlong ha Tura bad Shillong.

Ha kaba iadei bad ki jingpule kiba kham shalor, u Lat u la ong ba ka Sorkar kala plie ia ka Shillong Government College of Engineering ha u snem bala lah bad kan sdang noh shen ban pdiang noh ia ki samla pule. “Ka College of Architecture bad Urban Planning ha Ture ruh kan sa dep noh mynta u snem. Ka Sorkar kala pynkylla ia ka Captain Williamson Sangma Technical University Act ban pynkylla sha ka State University khnang ba ki College ka Jylla ki lah ban pyniasoh. Kane kan dei ka State University ba nyngkong eh ha Jylla Meghalaya” ula ong.

Shuh shuh u Lat u la pynpaw ruh halor ki sienjam ba la shim da ka sorkar jylla na ka bynta ban aijinghikai ia ki 1.5 lak ngut ki samla ha ki jait kam bapher bapher na ka bynta kine ki san snem ki ban wan. Katba ha kaba iadei bad ka umbam um dih ka sorkar kala pyniaid shakhmat ha kaba iadei bad ka jingpynioh um ha man la ki iing lyngba ka Jal Jeevan Mission, kata kaba la iaid mynta haduh 74% kaba long palat ia ka national average.

Shuh shuh ha kaba iadei bad ka rai jong ka Sorkar ban tei  ia ka New Shillong Township, u Lat ula ong ba kane ka kam ka la iaid mynta ha ki artylli ki bynta. Ka bynta ba nyngkong ka long ban tei ia ka Administrative City ha Mawdiangdiang bad kaba ar pat ka dei ka jingtei ia ka Knowledge City ha Mawkhanu kaba dang don mynta hapdeng ka jingiamir jingmut.