Pynpaw u MLA ka UDP na Sohiong ba kam don ka jingiapher jingmut haiing hasem

Syllad | The Rising MeghalayaFebruary 4, 2025

U MLA ka United Democratic Party (UDP) na Sohiong, u Bah Synsharlang Kupar Lyngdoh haka 3 tarik Rymphang ula thep kyrteng kum u kyrtong ka UDP na Sohiong-Nongspung ha kane ka elekshon MDC ha kaba u la ban jur ia ka jingdon kam ba dei ban shna noh ia ka map bad u pud u sam ba thikna jong ki Hima bapher bapher.

Haba kren sha ki lad pathai khubor u Bah Synsharlang u la ong ruh ba ka jingshim rai ka jng u ban iakhun ia ka elekshon ADC ka dei namar ka jingkwah jong ki paidbah ka constituency.

Une u MLA u la kyntait jur ruh ba ka don kano kano ka jingsngewthuh bakla ne ka jingiapher jingmut haiing hasem hadien ka jingshim rai u khun jong u Kni (L) Bah HDR Lyngdoh u Nathaniel Rymmai ba un iakhun ia kane ka elekshon na ka tiket Congress. U la ong ruh ba ka dei ka ri synshar paidbah bad mano mano ki lah ban iakhun ia ka elekshon.

U Bah Synsharlang u ban ban jur ruh halor ka jingdonkam ban pynkhlain ia ki ain kiba la don lypa jong ka KHADC bad ong, “Na ka kyrteng jong ka constituency hi, ngi tip ba ki don artylli ki HIma, kata ka Sohiong bad ka Nongspung. Ki don ruh ki shnat jong kine ki Hima, kata ka Nongwah Mawtamur kaba don ha khappud bad ka Assam bad kaba donkam ban pynthikna ban pynneh ia ka shongsuk shongsain.”

Nalor kata u la ban jur ruh halor ka jingdonkam ban pynkhlain ia ka synshar khadar naduh ki shnong ki thaw bad ong, “Nga kwah ruh ba baroh ki HIma kin don ia ki pud ki sam bad ki map kiba thikna, kata da kaba pyrto ruh ia ki jingjop jong ka EC ba la ialam da ka UDP ha ki lai snem shiteng jong ka jingsynshar.”

Haba kylli, u Bah Synshar u la ong, “Ngi long kiba la pynkhreh bha ban iakhun ia kane ka elekshon kum ka part bad ngin leh ia kaba bha tam ban ioh ia ka jingjop.”

U la ong ruh, “Ngim lah ban thied ia u paidbah da ka pisa, bad dei na kata ka daw ngi leit sha u paidbah da ka jingieid bad nga kyntu ruh ia ki paidbah ba kin kyrshan ia nga kum u kyrtong khnang ba ngan ioh ia ka jingjop ha kane ka elekshon ADC.”