Pynpaw u Myntri ba um pat ioh da ka jingthoh ia ka jingtyrwa wanrah lynti rel ka MTDF 

Syllad | The Rising MeghalayaOctober 30, 2024

U Myntri ka Tnad Toursim u Bah Paul Lyngdoh ha ka 29 tarik u Risaw u la ong ba un dang ioh pdiang ia ka jingai jingmut jong ka Meghalaya Tourism Development Forum (MTDF) na ka bynta ban wanrah ia ka High Speed Luxury Rail Network khnang ban pynduna ia ka jingbam por ha ka leit ka wan na Guwahati sha Shillong.

Haba kren sha ki lad pathai khubor u Bah Paul u la ong, “Ngan dang ioh pdiang ia kane ka jingtyrwa lyngba ka jingthoh na ka MTDF. Kano kano kaba dei na ka bynta ka jingmyntoi jong ka jylla Meghalaya bad ka bynta ban kyntiew ia ki kam jngohkai yn sa khmih bniah lyngba kane ka phang.”

Hynrei u la ong, “Lada phi iakren halor ka lynti rel kaba dei ka mat kaba jyrwit jyrwat la bun bun snem mynta, kane ka dei ka kam ka bym don jingiadei bad ka kam jngohkai, bad ka dei ka bynta kaba khmih da ka Tnad Transport, bad kano kano ka jingshim rai halor kane ka bynta yn lah ban shim rai da ka kynhun Myntri.”

Ha ka 25 tarik u Risaw ka MTDF ha ka dorkhas ba la ai sha ka Tnad Tourism ka la pynpaw halor ka jingdonkam ia ka Sorkar Jylla ba kan wanrah noh da ka policy kaba neh ban kyntiew ia ki kam jngohkai ha ka Jylla da kaba kyrpad ruh halor ka jingdonkam ban wanrah ia ka High Speed Luxury Rail Network khnang ban pynduna ia ka jingbam por ha ka leit ka wan na Guwahati sha Shillong.