Pynpaw u Myntri ka Jylla ia ka jingkiew ka kam pynmih dohkha ha ka jingialang ha Tamil Nadu

Syllad | The Rising MeghalayaJuly 13, 2024

Ka kynhun na Meghalaya hapoh ka jingialam u Myntri ka tnad Fiseries u Bah AL Hek ha ryngkat ka jingsynran lang da u SC Sadhu Secretary ka tnad Fisheries bad Kong AL Mawlong Director ka tnad Fisheries kala leit ban iashim bynta ha ka “2nd Fisheries Summer Meet, 2024” kaba la long ha ka 12 tarik Naitung ha Madurai, Tamil Nadu ia kaba la khot pynlong da ka tnad Fisheries jong ka Sorkar India.

Ia kane ka jingialang la sdang da ka jingplie ia ki projek da u Myntri ka Sorkar Pdeng uba khmih ia ka tnad Fisheries u Rajiv Ranjan Singh, ha ka jingdonlang u Myntri khynnah ka sorkar pdeng, ki myntri sorkar na ki jylla bad ki heh sorkar na kylleng ka ri India.

U Rajiv ula plie ia ki 4 tylli ki projek kaba bei pisa da ka PMMSY kiba kot sha ka T.57 lak na ka bynta ka Ri Bhoi District, ka Fish Kiosk ha Liarbang jong u Bah Ronal Tado, ka Biofloc Pond ha Mawkangi bad Mawiong, Sohbang jong u Bah Pyrkhatjngai Syngkli bad ka Kong Manbhatiolin Kharmyndai, ka Indigenous Breeding Unit ha Lalumpam Marngar jong u Bah Gumbir Syiem.

U Bah AL Hek haba aijingkren ha ka jingialang u la ong ba ka sorkar jylla ka iengskhem ha ka nongrim ban pynneh bad ban pynroi ia ka kam ri dohkha ha ka jylla ka ban long ruh ka lad ban kyntiew ia ka ioh ka kot ha ka Jylla.

Nalor kata ula pynpaw ruh ba watla ka jylla ka dang shu sdang shen ia kane ka kam hynrei kila don haduh 35,000 ki nongri dohkha ha ka jaka kaba don 4,500 hectare. Nalor kata u la pynpaw ruh ba kala don ka jingkiew kaba 12.33% ha ka jingpynmih ia ki dohkha na ka 4799 Metric Ton ha u 2011-12 sha ka 20,208 Metric Tong ha u 2023-24, bad halor kane ka jingjop ula ai khublei ia ka sorkar jylla bad sorkar pdeng kiba la shimkhia da kaba ai jingithuh ruh ia ki nongri dohkha ha ka jylla.

Da kaba pdiang ba ka kam ri dohkha kam dei tang ka lad ban ioh kamai kajih hynrei kadei ruh ka kolshor, na ka liang u Myntri u la ong ruh ba ka la don ka jingkiew ha ka ioh ka kot jong ka jylla ha kine ki 5 snem kiba la dep da ka jingpyntreikam ia ki prokram kum ka Blue Revolution bad PMMSY. U la pynpaw shuh shuh halor ka jingpynrung ia ka 2,299 hectare lyngba kine ki skhim, ryngkat bad ki jingkiew ha ka teknoloji bad ki jingtei kiba kongsan kiba ai jingmyntoi ia ka jingpynmih dohkha.

Ha kajuh ka por u la pyrto  ruh ia ka jingtrei borbah jong ka Meghalaya State Aquaculture Mission bad ka jingshimkhia ha kaban pynneh pynsah ia ki dohkha tynrai lyngba ka jingiatreilang bad ki shnong ki thaw bad ban pynkha ia ki symbai dohkha bapher bapher. Kumjuh u la pynbna ba kane ka Mission kan sa bteng ban iaid ha ka wat ka balai da kaba buh ia ka thong ban lah ban pynmih bad ban pyndap ia ka jingdonkam ia ka dohkha lyngba ki sienjam jong ki kam kyrshan pisa.

Haba pynpaw halor ki jingeh halor ki rukom long ki jaka hapoh Meghalaya, u Myntri u la ban jur ïa ka jingdonkam ia ki lad jingïarap pisa ha ka por kaba biang ha kaba pynduna ia ka  jingktah jong ki jingjia shah pynjulor ha ki bor ka mariang ia ki nongri dohkha, da kaba khot ïa ka jingiatreilang kaba khlain ha baroh ki bynta.