Pynpaw u Sanbor ba ka jingtyrwa ka long ban tei ia u dur mot ba shi ryngieng jong u Tirot Sing ha Dhaka, ym shi lyngkhot
U Myntri ka Tnat Arts and Culture barim u Bah Sanbor Shullai haka 17 tarik Rymphang, u la pynkynmaw ba u la phah ia ka jingtyrwa na ka bynta ban tei ia u dur mot ba shi ryngieng (full size) jong u Syiem Tirot Singh ha ka nongbah Dhaka, Bangladesh bad ym u dur mot uba tang shi lyngkhot (bust).
Haba kren sha ki lad pathai khubor u Bah Sanbor u la ong; “Ngam tip, hynrei ha ka por ka jong Nga kum u Myntri bad katkum ki rekod, ngi la tyrwa ban pynieng ia u dur mot ba shi ryngieng, hynrei namar ba ngam dei shuh u Myntri bad dei khmih, Ngam don jingtip ei ei halor kane.”
Ia kane u la pynpaw haba kylli halor ka jingplie ia u mot dur ba shi lyngkhot jong une u riewialeh laitluid jong ka jaidbynriew Hynniewtrep ha ka nongbah Dhaka, kata wat hadien ka jingpynbna jong ka sorkar na ka bynta ban tei ia u dur mot ba shi ryngieng jong u Syiem Tirot Sing.
Nalor kata u Bah Shullai u pyntip ruh ba um shym la ioh pdiang satia ia kano kano ka jingkhot sngewbha ban ia don ryngkat lang bad ka kynhun na ka jylla ban leit shapoh Dhaka hynrei tad ha ka khyllipmant kaba khatduh ha kaba um lah satia ban pyniasoh bad kane ka kynhun namar ka jingdon jong ka Dorbar Mang Tyngka hapoh ka iingdorbar thawain ka jylla.
Haba pynpaw ka jingkmen ba ha kaba khatduh la lah ban plie ia une u mot dur ba shi lyngkhot jong une u nongialeh laitluid ha Dhaka, u Bah Sanbor u la ong ba u la shim ia ki sienjam ban wanrah ia ka jingtyrwa ban tei ia une u mot dur ha Dhaka ha ka por ba u dang bat kum u Myntri ka Tnat Arts and Culture.
“Ha kaba kut hi kam lei lei namar ngi la lah ban plie ia une u mot dur ba shi lyngkhot bad kane ka dei ka khyllipmat kaba kmen tam na ka bynta ki nongshong shnong kiba dei ki Khasi bad Garo hapoh ka jylla, ia ki kur ki jait bad kiba haiing hasem jong u Tirot Sing, ia ka Hima Nongkhlaw bad ia baroh ki kynhun Seng Bhalang bad ki paidbah ka jylla.
Facebook
Instagram
Youtube
Twitter
Leave a Reply