Pynpep ka STEDS iaka Lukha Festival, sngewkhia iaka jingkylla rong ka Lukha

Syllad | The Rising MeghalayaJanuary 28, 2021

Ka Sonapyrdi Tourism & Economic Development Society (STEDS) kala pynpep noh iaka Lukha Festival mynta u snem namar ka khlam COVID-19.

U Lurstep Berstewyth Syih Publicity & Social Media Information Secretary STEDS, ula ong ba kila hap ban pynsangeh iaka Lukha Festival ha une u snem kum shibynta ban iatreilang bad ka sorkar haka jingiakhun pyrshah ban tem iaka jingpur ka khlam COVID-19.

Ula ong ba ka STEDS ka pynpaw ka jingsngewkhia kaba khraw halor ka jingnangjur ka jingkylla rong jngum (Sky blue) jong ka Wah Lukha na uwei u snem sha uwei pat naduh u snem 2007 kaba la jia nyngkong kaba la iap pathar ki dohkha ha shilynter ka wah Lukha.

“Kane ka jingkylla rong ka wah Lukha kala theh umpjah iaka jingtrei shitom ka STEDS ban iada iaka um ka wah bad ban kyntiew iaka kam jngohkai ha ka thain Narpuh,” ula ong u Lurstep.

Ula ong “Baroh ngi tip ba ka Wah Lukha ka long ka wah kaba bun dohkha bha ha ki por ba mynshuwa, bad ka long ka wah kaba khuid bad kaba bha ban pyndonkam, khamtam ki briew kiba leit ba wan lyngba ka shnong Sonapyrdi ki ju kynmaw tympang ia ki jingbang jong ki dohkha kiba na kane ka wah. Hynrei mynta pat tang ban peit ia ka ruh ym don shuh ba kwah, namar ka rong jong ka ka la long kum ka Umphniang sharak (Kerosene).”

“Harud ka Wah Lukha ka don ka Narpuh Wildlife Sanctuary kaba la tap da ki khlaw kiba rben bad ki mrad kiba har rukom bad ki dih um na kane ka wah ha ki por kiba mynshuwa, hynrei mynta pat wat ki mrad ruh kim treh shuh ban dih ia kane ka um,” ula ong u Lurstep bad kyrpad ia ka Sorkar jylla lyngba ka Environment Committee jong ka bad kumjuh ia kiwei kiwei ki kynhun trei mon sngewbha ba kin sngewbha ban buddien lem ia kane ka jingpynjakhlia ia kane ka wah kaba pawnam ban lap dien ia ki jingshisha.