Pynphai ka HYC Umiam Circle ar kali kiba kit da ki phew ngut ki bar jylla ki bym don kot don sla

Syllad | The Rising MeghalayaSeptember 4, 2023

Ka Seng Hynniewtrep Youths’ Council (HYC) Umiam Circle, hapoh ka jingialam ki Nongialam ka Circle baba kynthup ia u President bad General Secretary ha ryngkat ki dkhot, mynta ka janmiet sngi Nyngkong ki lah ioh ban bat ia ki artylli ki kali kata ka Force Traveller bad Sumo, kiba shong da ki barjylla kumba 25 ngut kiba wan na Assam da ka jingthmu ban leit trei sha ka karkhana Topcem Cement ha Jaintia Hills bad kiwei kiwei ki jaka jong ka Sor Shillong.

Ha ka jingtohkit jong ki dkhot ka HYC, la lap bad shem ba kine ki briew kim don satia ia ki kot ki sla kiba biang ba kin wanrung bad trei bylla hapoh ka Jylla jong ngi hynrei sngew lyngngoh ba kumno ki lait ban wan iaid lyngba ka Infiltration checkgate kaba don ha Byrnihat, Ri Bhoi District. Kumta na ka liang ka HYC ka la pynphai kylla noh ia kine ki kali ha ryngkat ki briew sha ki jaka kiba ki wan da ka jingmaham ruh ba kim hot ban wan khlem ki kot ki sla kiba biang. 

Na ka liang ka HYC ka ynrem jur ia kane ka jingleh jong ki pulit kiba ap ha katei ka Gate bad ka kyntu ia ki bor kiba dei khmih ba kin shimkhia bad pyndep hok ia la ka kamram kaba la bynshet ha ki. Ka HYC ka la ong ruh ba kane ka jingleh jong ki ka lah ban buh ka jingma ia ka Jaidbynriew.

Shuh shuh ka HYC ha u kyrwoh lyngba u Shinestar Kharpan, President HYC Umiam Circle ka la ong ruh ba kan iai long kaba  phikir bad peit pyrman bha bad pynlong ruh ka jingtalasi kaba khah khah khnang ba yn lah  ban khanglad ia ka jingrung jingmih ki poiei ki poiwir ha kane ka Bri u Hynniewtrep.