Pynpoi um u Wailadmiki Shylla hadien 20 snem na Umngot sha Jowai, yn ioh umdih haduh 7 million litre shisngi

Russel NongrumMay 27, 2022

Baroh shi katta, ka don ka jingngeit ba ym bit ban iakynduhlang ka wah Myntdu bad ka wah Umngot, pynban ka PHE (electrical division) kala lah syndon ban wanrah iaka Umngot da kaba kam shilliang iaka wah Myntdu bad pynpoi haduh ha jaka pynkhuid um ne treatment plant ka PHE ha Urkhla, Jowai ban sam umbam umdih iaka Jowai haduh 7.59 Million Litre Shisngi ka um sha baroh kawei ka sor Jowai.

Kane ka projek sam umbam umdih ka dei kaba la sdang 20 snem mynshuwa da u MLA barim ka Jowai u (L) Sing Mulieh, u Deputy CM barim ka Jylla u Dr RC Laloo uba la pynpoi iaka um haduh Sohmynting, hynrei mynta ka kynti la pyndep bad la pynpoi iaka um haduh ha Jowai da u MLA ba mynta u Wailadmiki Shylla hadien bala dep siew lut iaki bill ka MePDCL kaba la kynjoh haduh T.50 lak tam ban pynioh iaka bording.

Nalor katta, sa 59 lak 69 hajar la bei pisa da ka sorkar jylla lyngba ka state plan ban pyndep iaka projek ban shna iaka pump bad kiwei kiwei ki jingtei ban pyndep iaka projek.

Kane ka projek umbam umdih ka dei ka Jowai Renovation Water Supply kaba la sdang da ka sorkar Jylla bad la bei pisa da ka Ministry of DoNER hapoh ka NLCPR naduh u snem 2002 haka dor T 1541.13 lakh bad la wan ban plie paidbah iaka da u Myntri ka PHE u Bah Renikton Lyngdoh Tongkhar haka sngi Thohdieng.

Nalor u Bah Tongkhar la iadonlang u MLA ka Jowai Wailadmiki Shylla bad u Sniawbhalang Dhar Myntri Pynroi sor, CEM JHADC Thombor Shiwat, CEM barim ka JHADC Madonbai Rymbai uba iadonlang ryngkat bad ka tnad PHE ban iatreilang ban ioh jingbit ban tan bording na Khliehtyrshi Sub Station.

Kiwei kiwei kiba iadonlang ki dei ki MDCs, DC bad SP ka District Chief Engineer ka PHE CR Challam, EE PHE Electrical ma Paul Synnah uba pyniaid iaka jingialang plie paidbah.

Kane ka umbam umdih ka Jowai ka sam um haduh 7.59 MLD bad la mang haduh 30 snem, katta haduh 2034 ban sam umbam sha ki nongshong shnong u ban kynjoh 62000 ngut ka jingbun briew.

U Bah Tongkhar haba kren kum u kongsan ula iaroh ia u MLA Jowai uba la trei shitom miet ban sngi ban pynurlong iaka jingangnud u paidbah ban pynioh umbam umdih na Umngot.

Ula ong ba ka jingtreishitom ki shi kynum u Ma Sniawbhalang bad u Ma Wailadmiki kala pynlong ia kane ka projek ban jop.

U Myntri Pynroi sor ma Sniawbhalang Dhar haba kren ha kane ka sngi ula ong ba ka Jylla ka dei kaba wan shakhmat ban pyntrei iaka skim Jal Jeevan Mission (JJM) bad ula iaroh ruh ia u Wailadmiki uba la shimkhia ban pyndep iaka umbam umdih ka Jowai nalor ban ialeh shitom bad pynkhih iaka sorkar ban pynbor ban pynioh um iaka shnong Khliehtyshi bad ka Mihmyntdu.

“Tang ka um kam pat biang, hynrei haka jingialam ka NPP iaka sorkar, ka Jowai kala ioh shibun ki kam pynroi kiba kynthup iaka Jowai Bypass (Thadlaskein-Soomer) ka ban shna biang kaba la tip kum ka resurfacing haka jinglut kaba T.15 Klur,” la ong u ma Sniawbhalang.

Ula iathuh ruh ba ka surok Moodymmai Sohmynting Demthring yn kylla noh iaka na ka surok shnong sha ka state road bad ka sorkar kala mang T.42 klur ban shna iaka bad iaka surok Treiongriang Khliehrtyrshi Road kaban kiar iaka shnong Jowai na Dawki Amlarem Jowai Road haka jinglut kaba T. 93 klur.

Kiwei kiwei ki jingtei ki kynthup iaka jingpynbha iaka Jowai, Thadlaskein, ka Mini Secretariat bad kiwei kiwei ki kam tei jingtei baroh la kot sha ka 400 klur.

U MLA Jowai ma Wailadmiki haba kren ula kyntu iaka u myntri pynroi sor ban kynthup iaka Jowai haka Atal Mission for Rejuvenation and Urban Transformation (AMRUT) ban pynbiang iaka umbam umdih ka Jowai kaba nangbun nangbun ki nongshong shnong bad kiwei kiwei ki jingtei ban iada iaki um ki wah.

Shuh shuh u Chief Engineer PHE, CR Challam ula ong ban nym thud ka jingpynbiang um iaka Jowai, ka sorkar kala mang sa T. 4 klur 48 lakh ban pynbha iaki pump set namar ba kila rim. Ula ong ruh ban kin buh iaka Micro Processor haka jinglut ba T.3 klur 72 lak ban pynbha iaka bording ba kan nym thud. Baroh ka jinglut kala kynjoh sha ka T.8 klur bad ia kane yn pyndep hapoh 6 bnai. Ula ong ruh tang ban sam iaka um kam biang, hynrei ka tnad PHE bad ki engineer ki dei ban shimkhia ban sam iaka um kaba bit ban dih ia u briew hadien bala jur ka jingtuid ki jakhlia jaklait sha ka wah.

U Myntri PHE ula buh mawnongrim ruh ban sdang iaka Khliehtyrshi Combined Water Supply Scheme bad Mihmyntdu Water Supply Scheme kaba bei pisa lyngba ka Jal Jeevan Mission haka jinglut kaba. 24,35,10000 klur bad 32,33,78000 klur. Ka tyllong um na ka bynta ban tan um iaka Khliehtyrshi ka dei na ‘Thwai Langdung’ bad iaka Mihmyntdu pat na Wahsahkti kaba don hajan ka Jowai Bypass ( surok Thadlaskein-Soomer).