Pynpra ka tnad kam khlaw ïaki jingthung beaiñ, ïoh biang ki shnong Khasi Pnar ïaki jaka rep ha Assam

Syllad | The Rising MeghalayaApril 9, 2019

JOWAI: Ka jingshimkhia ka tnad kam khlaw ka Cachar District, Assam kala iarap ban pynïoh biang ïaki jaka rep jong ki paid Khasi-Pnar ba shong ba sah ha Assam ha Kalakhal pt-1, Kalakhal pt-11 bad Bubonkhal kiba la shah kyntur ha kiwei ki jaidbynriew ki bym dei ki riewlum kiba thmu ban knieh ïa kitei ki jaka rep ba seisoh.

Ka Khasi Students’ Union (KSU) bad ka Barak Valley Khasi Jaiñtia Welfare Organisation (BVKJWO) haka 28 tarik u bnai Lber kila ujor sha u DFO Cachar District, Assam bad kila leit jurip ïa kitei ki jaka kaba jur bha ka jingkyntur pud da ki briew bym dei na ka jaid bynriew riewlum.

Haka 7 tarik une u bnai ka kynhun jong ka tnad kam khlaw katei ka district kala hiar biang sha kitei ki jaka rep bad pom lut ïa baroh ki jingthung jingtep kiba la thung beaiñ bad pynpra ruh ïaki ïing ki sem sah bri bala shna beaiñ ha kitei ki jaka.

Na kaliang ka Khasi Students’ Union (KSU) bad ka Barak Valley Khasi Jaiñtia Welfare Organisation (BVKJWO) ryngkat bad ki nongshong shnong jong kitei ki lai shnong kila pynpaw ka jingsngewnguh ïaka tnad kam khlaw ka Cachar kiba iarap ban pynioh biang ïaki ïa kitei ki jaka rep.