Pynrasong ki barikor ïaki Sunon Deiriti ha Shilpagram

Syllad | The Rising MeghalayaSeptember 28, 2021

Ka North Eastern Zone Cultural Centre, Dimapur ka la pynlong da ka lyngwiar thohdur ki barikor ha ki Sunon Deiriti jong ki jylla ka thaiñ shatei lammihngi ne Painting Workshop and Renovation of Pavilions ha Guwahati, Assam ba la ju tip kum ka Shilpagram.

Kane ka Lyngwiar Thohdur kan sdang naduh 27th September, 2021 haduh 14th October, 2021 ha ki ar bynta ban shim bynta da ki barikor samla na la ki jylla jong ka thaiñ shatei lammihngi jong ka Ri India. Ka bynta ba nyngkong yn trei thohdur da ki barikor na Assam, Arunachal Pradesh bad Meghalaya naduh 27th October haduh 4th October, 2021.

La pyniaid ia kane ka lyngwiar thohdur da u Mr Vezwuso Phesao, Exhibition Officer, NEZCC, Dimapur ryngkat bad la ki kher ki mer na Shilpagram, Guwahati. Manla ki kynhun ki dei ban thohdur da ki snap jong ka rikynti na la ki jylla lajong bad ki barikor ba shim bynta na jylla Meghalaya ki long u samla Ericson Majaw, Ferrando Mawrie, Shidalin Chyrmang bad Fasterfield Ryntathiang. Lah ban kdew ba ka samla Shidalin Chyrmang na shnong Umkiang, East Jaintia Hills, ka long ka ba la dep pule BFA na Silchar University bad kiwei pat ki dei ki ba dang pynkhreh ban leit pule naduh mynta u snem.

Ia ki kynhun jong ki barikor na la ki jylla lajong la ialam da ki barikor rangbah ki ba kynthup ia u Mr Manoj Roy, Exhibition Officer, Cultural Affairs Department Government of Assam, Guwahati; ka kynhun na Arunachal Team la ialam da u Mr Mr Punyo Chobin, Head of Department, Fine Arts, Rajiv Gandhi University, Itanagar, bad ka kynhun na Meghalaya la ialam da u Bah Raphael Warjri, Chief Art Director, Riti Academy of Visual Arts. Ka bynta ba-ar jong kane ka lyngwiar thohdur kan bteng biang naduh ka 5tarik haduh 14tarik October, 2021, ka ba kynthup mar san ngut ki barikor na ki jylla Manipur, Nagaland, Mizoram, Tripura bad Sikkim.