Pynrem jur bad dawa pan mab ka MEPA bad SPC na u President ka VPP ba kynthoh ia ki lad pathai khubor

Syllad | The Rising MeghalayaFebruary 2, 2025

Ka Shillong Press Club (SPC) bad ka Meghalaya Editors’ and Publishers’ Association (MEPA) ki la ai por san sngi ia u President ka Voice of the People Party (VPP), u Bah Ardent Miller Basaiawmoit ba un pan mab namar ka jingkynthoh bym don nongrim  pyrshah ia ki artylli ki lad pathai khubor, kata ka BatesiTv bad ka t7 lem kumta kin leh ei ei pyrshah ia u bad ka party jong u.

Ha ka shithi ba la phah sha une u nongialam ka VPP, na ka liang ka SPC bad MEPA ki la pynrem jur ia kane ka jingkynthoh jong u Bah Ardent ha ka jingialang paidbah kaba la long ha Nongstoin, West Khasi Hills District ha ka 15 tarik Kyllalyngkot, ha kaba u la pynjah burom pyrshah ia kitei ki artylli ki lad pathai khubor, bad kaba buh ruh ha ka jingma bad ka jingbym shngain ia ki nongpathai khubor.

“Kum ki nongpathai khubor, ka dei ka kamram ka jong ngi ban pathai ia ki khubor kiba iadei bad ka jylla bad ki nongshong shnong jong ka, hynrei ki jingkynthoh bym don nongrim kum ki jong phi ka buh jingma shibun ia ka jingshngain jong ki nongpathai khubor jong ngi,” ong u kyrwoh ba la soi da u President ka SPC u Bah Deimaia Siangshai bad u Vice President ka MEPA u Rajiv Choudhury.

 “Ngi dawa ka jingpynshai ba mardor halor kane ka jingkynthoh ka jong phi ha kane ka jingialang paidbah namar ki khubor ba la pynmih da kine ki lad pathai khubor ki dei katkum ka jingtip jong ngi, kiba shisha bad ka bym don kano kano ka jingpyrshang ban ktah mationg ne pynthohbria iano iano ruh ne ia ki seng sain pyrthei,” ki la bynrap.

Nalor kata ki la ong ruh, “Khatduh eh, ym don satia kino kino ki Seng Sain pyrthei, ki Seng Bhalang ne Seng Kieng atiar lane ki nongialam jong kino kino ki kynhun kiba lah ban buh jingkylli ia ka kam jong ngi haba ngi dang trei ia ka kam kum ki nongthoh khubor bad nonglum khubor.”