Pynrem jur ka ACHIK ia ki MLA Garo ba kyntait ia ka resolution ban wanrah ia ka nongbah Tlang ha Tura

Syllad | The Rising MeghalayaMarch 8, 2025

Ka A’chik Conscious Holistically Integrated Krima (ACHIK) haka 7 tarik Lber ka la pynrem jur ia ki MLA ka Rilum Garo halor ka jingkynnoh shukor ia ka rai u paidbah da kaba kyntait ia ka resolution ban wanrah ia ka Nongbah Tlang (Winter Capital) ha Tura, West Garo Hills District.

Kane ka la wan long shi sngi hadien ba ka Iingdorbar ka la sakhi ia ka resolution ba la weng noh da u nongialam liang pyrshah u Mukul Sangma halor ka jingpynthikna ka sorkar Jylla lyngba u Myntri Rangbah u Conrad K Sangma ban thaw ia ka committee ka ban bishar bniah ia ka jingtyrwa ban don ia ka nongbah Tlang ha Tura.

Jan baroh ki MLA na Rilum Garo ki la kyrshan ia ka jingmut ban thaw ia ka nongbah Tlang ha Tura, hynrei ki la hap ban kyntait ia ka resolution namar ka jingeh kumba ju pyniaid ia ki kam hapoh ka iingdorbar thaw ain ka Jylla ka bym pat ju sakhi ia ka jingmynjur ia ka resolution ba la wanrah da ka liang pyrshah.

Lyngba u kyrwoh ka ACHIK watla katta ka la ong, “Kane kam dei tang ka jingpulom ha ka sain pyrthei, hynrei ka dei ka jingthombor beit beit ia ka jingangnud bad ia ka hok jong ki paidbah ka Rilum Garo.”

“Ka jingdawa ban wanrah ia ka Nongbah Tlang ha Tura kam dei ka jingdawa kaba khlem nongrim ne kaba thymmai, hynrei ka dei ka jingkhot kaba dei hok bad shong nongrim ban pyniaid ia ka synshar khadar kaba iaryngkat ha ka jylla Meghalaya. Ka Shillong kum ka nongbah ba tang marwei ka la wanrah iaka jingktah ka roi ka par hapoh Rilum Garo bad kaba lam sha ka jinghiar arsut ha ki jingdon ia ki jingtei kiba kongsan, ka jingbym pyntreikam beit ia ki polisi bad ka jingbym iahap halor ka jingpynleit jingmut ia ki ophis sorkar bad ki jingdon jingem tang ha kawei ka thain,” ka la ong.

Da kaba pynpaw ba ka kyntait ban ailad ba kane ka jingshukor kan iaid khlem ka jingtip, ka ACHIK ka la pynbna ia ka rai jong ka ba ki nongmihkhmat paidbah ki dei ban shim ia ka jingbahkhlieh da kaba pynpaw ia ki kyrteng jong ki bad ka jingdawa ba ki dei ban ai ka jingpynshai.

“Ngin pynlong ia ki jingiakhih, ki jingpynshai paidbah bad ki jingiakhih katkum katkum ka synshar paidbah ban pynthikna ba ka jingdawa ban wanrah ia ka Nongbah Tlang ha Tura kan dang iai long ka mat kaba hakhmat eh. Ngin sa ujor sha u Lat ka Jylla, sha ka President ka India lem bad kiwei ki bor jong ka Riti Synshar Ri ban tuklar bad pynthikna ia ka rukom pyniaid ia ka bor synshar khadar ha Meghalaya,” bynrap ka ACHIK.