Pynrem jur ka BJP Mahila halor ka jingshah pyniap dusmon ka longkmie ha Donaskur

Syllad | The Rising MeghalayaSeptember 13, 2023

Na ka liang ka BJP Mahila Morcha, Meghalaya ka pynrem jur ha kaba iadei bad ka jingjia shah pyniap dusmon jong kawei ka longkmie kaba la jia ha ka shnong Donaskur hapoh Elaka Narpuh, East Jaintia Hills ha kane ka sngi Nyngkong ba la lah.

Haba pynpaw ka jingsngew kyndit kaba khraw halor kane ka jingshah pyniap dusmon jong ka longkmie ba la tip kyrteng kum ka Kong Priskila Suchiang 45 snem rta na ka liang ka BJP ka pynrem jur ia kane ka kam leh riewkhlaw jong ki briew kiba donkti bad ka phah ruh ka jingsngewlem sha ki arngut ki khun jong kane ka longkmie kumjuh sha kiba haiing hasem.

Ka BJP ha u kyrwoh lyngba ka State President ka BJP Mahila Morcha ka Susuki Pariat  ka la ong ruh ba kane ka kam thombor ba sngew shyrkhei ka buh ka jingeh ban pynneh ia ka jingsuk, bad kane ka pyni ruh halor ka jingpynkhein jubor ia ka hok ban im ba la pynkhamti katkum ki riti synshar khadar jong ka ri India ne constitution. Ka BJP ka la ong ruh ba ki kam pyniap dusmon pyrshah ia ki kynthei la ha kino kino ki rukom ka dei ka bym lah satia ban pdiang hapoh kane ka imlang ka sahlang.

Ha kajuh ka por ka BJP ka kyntu ruh ia kino kino kiba don jingtip ba kin wan shakhmat ban iarap lem ha kaba iadei bad ka jingtohkit halor kane ka jingjia.

 “Na ka liang ka BJP ka pynrem jur halor kane ka jingjia shah pyniap dusmon jong kane ka longkmie. Kiba kum kine ki kam pyniap ba shyrkhei pyrshah ia ki kynthei ka dei kaba pynkyndit shibun bad kaba dei ban shim ia ki sienjam jong ka jingpynshitom kaba tyngeh,” ong ka president.

Shuh shuh ka long ruh ba ka seng ka kyrmen skhem ba na ka liang ki pulit kiba pynlong ia ka jingtohkit halor kane ka jingjia kin ioh ban kem noh mardor ia kine ki runar kiba donkti bad ban pynshitom katkum ka ain.