Pynrem jur ka BJP Meghalaya halor ka jingshah pynpra u motdur u Syiem Tirot Sing ha Dhaka

Syllad | The Rising MeghalayaAugust 7, 2024

Ka Bharatiya Janata Party (BJP) Meghalaya, kala pynrem jur ia ka kam leh riewkhlaw jong ki shitniam Muslim hapoh ka ri Bangladesh da kaba pynpra dusmon ia u motdur sahkynmaw jong u khlawait ka jaidbynriew Hynniewtrep u Syiem Tirot Sing ia uba la pynieng dang ha kine ki khyndiat bnai ba la dep ha phyllaw jong ka ka Indira Gandhi Cultural Centre ha Dhaka.

Ka Seng BJP ka Jylla ka la shimkhia bha halor kane ka kam leh dusmon kaba pynpaw ia ka jingniew bein ia ka jingkynmaw burom ia une u riewshlur bad kaba ktah jur ia ka jingsngew jong baroh ki nongshong shnong ka jylla jong ngi bad ka ri hi baroh kawei.

“Ka party ka la kyrpad ruh ia ka sorkar Pdeng ba kan shim ia kane ka kam bad kino kino kiba khmih bad pyniaid mynta ia kane ka ri ba marjan khnang ban pynthikna halor ki jingiada ia kiba kum kine ki jingtei sahnam bad ban pynkut noh ia ka jingiaumsnam pyrshah ia ki kynhun rit paid ha Bangladesh,” ong u nongaiktien ka BJP ka Jylla u Bah Mariahom Kharkrang.

Une u nongialam ka BJP u la kynthoh ruh da kaba ong, “Ki dur ki dar kiba mih paw na Bangladesh ki la pynlyngngoh shibun ia baroh ki briew kiba lah shai ha baroh ka pyrthei. Ka jingpynpra ia u motdur sahnam jong u Syiem Tirot Sing bad ki kam thombor pyrshah ia ki rit paidbah bad ia ki jaka mane ki jong ki hapoh Bangladesh ki dei ki bym lah satia ban pdiang bad kaba la pynsngewsih jur ia ngi baroh. Ngi duwai ba ka bor sngewthuh kan synshar pat bad ba ka jingsuk kan wanphai noh shen.”