Pynrem jur ka CPC ia u shitniam Hindu ba pynkhein ia ka jinglong kyntang ka iingmane ha Mawlynnong

Syllad | The Rising MeghalayaDecember 27, 2024

Ka Central Puja Committee (CPC) ka la pynpaw ka jingsngew kyndit halor ka video kaba la saphriang ha ki rynsan social media ha kaba la iohi ia uwei u briew uba kyrteng u Akash Sagar uba la leh ia ka kam pynbitar bad pynkhein ia ka jinglong ba kyntang jong ka iingmane Blei jong ka Balang Epiphany ha ka shnong Mawlynnong, East Khasi Hills.

U President CPC u N Bhattacharjee lyngba u kyrwoh ha ka 26 tarik Nohprah u la ong, “Ngi pynrem jur ia kane ka jingleh kam beain jong une u riew shimet bad ngi kyntu jur ia ki bor district ba kin pynlong mardor ia ka jingtohkit halor kane ka kam bymman bad ban shim ia ki lad jingpynshitom katkum ka ain.”

U la ong ba ka Meghalaya ka dei ka jylla kaba la tip bha ha ka ri baroh kawei halor ka jingpynneh ia ka jinglong iatylli bad ka suk ka sain hapdeng baroh ki kynhun niam bapher bapher kiba don ha ka jylla, ia kaba ym dei ban ailad ba kan shah ktah lyngba ki jingleh jingkam jong kiba kum kine ki briew shimet ki bym don ka jingkitkhlieh da ka jingthmu ban pynthud ia ka suk ka sain bad ka jingialong shipara hapdeng ki nongshong shnong kiba don ha la ki jong ki jong ki niam bad ki jingngeit bapher bapher.

Kane ka la wan long ruh tang khyndiat por hadien ba ka nongialam jong ka Thma U Rangli Juki (TUR) ka Kong Angela Rangad ha kane ka juh ka sngi ka la leit ban mudui da ka ejahar pyrshah ia uwei u nongleh social media uba la leit rung beain hapoh kawei ka iingmane jong ka Balang Epiphany ha Mawlynnong, EKH bad pyrta ia ka kyntien ‘Jai Shree Ram’ nalor ki jingrwai kiba long pyrshah ia ka jingngeit Khristan da ka jingthmu ban pynmih ia ka jingsngew iapher niam.