Pynrem jur ka FKJGP ia ka jingshah kem u president ka NEHUSU, dawa thung tohkit ba laitluid

Syllad | The Rising MeghalayaApril 29, 2025

Ka Federation of Khasi Jaintia and Garo People (FKJGP) ka la pynrem jur ia ka jingshah kem u president ka North Eastern Hill University Students Union (NEHUSU) u samla Sandy Sohtun bad dawa na ka sorkar jylla ban pynlong da ka jingtohkit kaba laitluid halor kane ka jingkynnoh thombor ia u nonghikai.

Ha u kyrwoh ba la pyllait ha ka 28 tarik Iaiong u vice president FKJGP u Kitboklang Nongphlang u la ong, “Ngi sngew ba ka lah ban don kaei re kaei sha lyndet jong kane ka jingkynnoh pyrshah ia u samla Sohtun da uwei na ki nonghikai kaba thmu ban pynsngap jar ia ka sur jong ki samla pule ba kin dawa ia la ki jong ki hok na ka bynta ka lawei ba phyrnai lyngba ka jingiaid beit ha ki jingtreikam jong ka skulbah NEHU.”

U la ong ruh ba ka skulbah ka la sakhi ia ki jingiakhih hadien ba ka NEHUSU hapoh ka jingialam jong u samla Sandy Sohtun ka la pynpaw ia ki jingdkoh ha ki jingtreikam jong ka skulbah, bad kane ka la lam sha kaba iai bteng ban dawa na ka bynta ban weng noh ia u Vice Chancellor ka skulbah u Prof PS Shukla.

Nalor kata une u nongialam ka FKJGP u la kynthoh ruh halor ka jingpulom jong ka sorkar ban tuklar na ka bynta ban pynbeit ia kine ki jingeh hapoh kane ka skulbah kat haduh mynta.

Nalor kata ka FKJGP ka pynpaw ruh ba ka jingphah bor pulit shapoh ka campus jong ka NEHU ka la wanrah ka jingklumar jingmut hapdeng ki samla pule ha ka jaka ban pynioh ia ka jingsngew shngain hynrei kaba lam pynban sha ka jingpyntieng pynsmiej.

“Kumta ngi kyntu jur ia ka sorkar jylla ba ka dei ban tuklar mardor da kaba pynlong ia ka jingtohkit kaba laitluid halor kane ka jingjia baroh,” ong une u nongialam.

Ha kajuh ka por ka FKJGP ka maham ruh ia ki bor kiba na bar ba kin kiar ban pyrshang ban ialam bakla bad ban buhrieh ia ki jingleh ba bakla jong u VC ka skulbah uba la shah kyntait ha ki samla pule kumjuh ha ki nonghikai bad ki nongtrei jong ka skulbah. “Ngin wad iaka jingshisha bad ngin ym ai lad ba ki samla pule kin long ki langknia.”