Pynrem jur ka HITO ia ka jingdawa bhah kyrpang da ki nongshong shnong ki bym dei ki trai Ri trai Muluk

Syllad | The Rising MeghalayaJune 19, 2024

Ka Hynñiewtrep Integrated Territorial Organization (HITO) Students’ Wing ka pynrem jur ha kaba iadei bad ka jingdawa jong ki nongshong shnong ki bym dei ki trai ri trai muluk  ka Jylla kum ki Bihari, Nepali ba kiwei pat ban bhah kyrpang ha ka liang ka ioh kam ioh jam bad ka pule puthi ha kane ka Jylla lyngba ka State Reservation Policy.

“Ngi kwah ban pyntip sha baroh ba ki trai shnong ka Bri u Hynniewtrep kim shym la dawa bhah kyrpang ha Bihar, Darjeeling West Bengal bad Uttar Pradesh kumba kine ki nongshong shnong ki la dawa hapoh kane ka Jylla. Lada ki kwah ban dawa bhah kyrpang, ki dei ba leh sha la ki jong ki shnong kiba ki wan.Kim dei ban tam ia u pud da kaba pyrshang ban dawa bhah kyrpang ha ki jaka shong shnong jong kiwei pat,” ka la ong.

Ka HITO ha u kyrwoh lyngba u Bah Iajanlang Sohtun bad  Kitshemphang Warjri Chairman bad Vice-chairman ka la ong ruh ba kum kine ki jingdawa ki dei ki bym shong nongrim bad ki dei ban kiar na kiba kum kine ki jingdawa namar kim don hok ha ki jaka puta ki jong ngi namar baroh ki district hapoh Rilum Khasi bad Jaintia haduh mynta ki dang hap hapoh ka Khasi States Treaty ha kaba kine ki jaka shong shnong kim pat ju iasoi ia ka ‘Instrument of Merger’ hynrei ki la iasoi tang ha ki “conditional treaty of Accession with special conditions.”

Na kane ka HITO ka don ka jingdawa kaba jur ban pyntreikam ia ka Inner Line Permit (ILP) watla ka Meghalaya ka hap hapoh ka Sixth Schedule. Lah ruh ban pynkynmaw ba ka Meghalaya Transfer of Land Regulation Act 1971 ka khang pyrshah ia ki bar jylla ba kin thied jaka ha Meghalaya.

“Kumta ruh ngin ym ailad ia kiwei pat ki briew ki bym dei ki trai muluk ba kin wan tuklar ia ki hok ki jong ngi lane ban wan knieh noh ia ka pliang ja ka jong ngi. Kiba kum kine ki jingdawa ki dei ki jingleh pynbitar bad ki dei ban kiar mardor. Ki nongshong shnong ki bym dei ki trai muluk ki dei ban tip ia la ki jong ki jaka ha kaba iadei bad kiba kum kine ki mat.Ki dei ban sngewthuh ba ki dei tang ki nongshongwai ha ka jylla ka jong ngi bad ba ki dei ban burom ia ka rai ba la shim da ki nongshong shnong kiba dei ki trai ri trai muluk,” bynrap ki nongialam ka HITO.

Nalor kata ka HITO a pynkynmaw ruh ba ki don katto katne ki kynhun nongshong shnong kiba dawa bhah kyrpang hapoh kajuh ka jaka shong shnong bad kiba pynkhihwin ha ki thain khappud ka Meghalaya bad Assam da kaba pynpaw ba ki kwah ban pyniasoh sha ka Assam, khamtam ha ka thain Langpih. Ka long kaba sngew bitar ba kine kijuh ki nongshong shnong mynta ki kwah ia ka bhah kyrpang ha kane ka jylla jong ngi.

Ka la ong ruh ba katkum ka histori kine ki nongshong shnong ki dei kiba donkti halor ka jingpyrshang ban ieng ialeh pyrshah ia ki hok jong ki trai ri trai muluk ha ki snem 1978, 1987 bad kumta ter ter.

Kumjuh ha ka por jong ka jingialeh Hill State kine ki nongshong shnong ba la kdew haneng kim shym la don bynta ha kane ka jingialeh.Kumta kumno mynta ki nud ban dawa bhah kyrpang na ka bynta jong ki?

Kumta ruh ka HITO ka la ong ba kan ym lah ban shah ia kiba kum kine ki jingleh pynbitar da kine ki nongshong shnong ki bym don ia ki hok ban dawa ha kine ki jaka puta ki jong ngi, bad ka Seng kan ieng skhem ban iada ia ki hok jong ki trai ri trai muluk bad ban ym ailad ia kiba kum kine ki jingdawa ki bym don nongrim.