Pynrem jur ka HNLC iaka jingpyndonkam bor ki pulit pyrshah iaki paidbah ba pynlong jingiakhih ha East Jaintia Hills

Syllad | The Rising MeghalayaAugust 25, 2023

Ka Hynniewtrep National Liberation Council (HNLC) ka la pynrem jur ha kaba iadei bad ka jingpyndonkam bor jong ki pulit pyrshah ia ki riew paidbah kiba pynlong ka jingiakhih ban pynpaw pyrshah halor ka jingthmu ban pyniar ia ka jingtreikam jong ka karkhana dewbilat ha ka shnong Thangskai, East Jaintia Hills kaba la jia hynnin ka sngi 24 tarik Nailar 2023.

Ka HNLC ha u kyrwoh lyngba u Bah Sainkupar Nongtraw General secretary ka la pynrem jur ruh ia ka jingleh jong ki bor pulit ba la lamkhmat da u SP u bym dei satia u trai jylla.

Ka HNLC ka la ong ba ka jingpyndonkam bakla ia ki marpohkhyndew da ki karkhana dewbilat ne cement plant bad ki karkhana Coke ka la ktah jur ia ki tyllong umbam umdih bad pynjakhlia ia ka mei mariang.

Ha kajuh ka por ka HNLC ka la ban jur ruh halor ka jingdonkam ban pynkut noh ia ki jingiakynad hapdeng ki trai ri trai muluk jong ka bri u Hynniewtrep.

“Ngi shem ia lade kum ka ri kaba la ngat sha ka jingshah banbor bad halor ki buit jong ka jingpyniapait iapra ba la pyntreikam da ka sorkar, kata ia kaba la pyniaid da ki briew ki bym dei satia ki trai ri trai muluk,” ong u kyrwoh.

Shuh shuh ka HNLC ka la ong ruh ba ki nongshun ki long kiba sianti, kumta ka long kaba donkam ia ki khun ka bri u Hynniewtrep ba kin sangeh ban ialeh markylliang bad ban shim kabu iwei ia iwei pat, kata khamtam  ki bor pulit kiba dei ki trai muluk kiba dei ban ai ka jingiada ia la ki jong ki briew ha ka jaka ban thombor ia ki tang ban pynhun ia ki heh jong ki bad ia ki nongkhaii kiba dei na shabar ka jylla.