Pynrem jur ka KSU Mawlai ia ka jingkawang bom pynsat khmat ki pulit hapoh ka dukan Sha

Syllad | The Rising MeghalayaSeptember 5, 2023

Ka Khasi Students’ Union (KSU) Mawlai Circle ka pynrem jur ha kaba iadei bad ka jingkawang bom jong ki pulit hapoh dukan Sha hadien ba ka la mih ka jingiakynad hapdeng ki dkhot kawei ka sengbhalang bad ki pulit ha ki thaiñ Khyndailad mynta ka sngi Nyngkong ha kaba la  sakhi ruh ia ka jingpynibor jong ki pulit.

Ka KSU ha u kyrwoh lyngba u Biangbor Paliar, President KSU Mawlai Circle ka la ong ruh ba ha kane ka jingpyni bor ki pulit ki la thombor naphang khlem kheiñ snep shuh ia ki kynthei briew kiba die dukan hapoh ka jaka pynieng kali jong ka MUDA ha pyrshah ka SBI ophis hajan Khyndailad.

Ka KSU ka la ong ruh ba kane ka jingthombor jong ki pulit da kaba kawang da u bom pynsat khmat hapoh ka dukan die sha wat hapdeng ba kitei ki longkmie ki la khang khyrdep ia ka dukan ka jong ki kalong kaei kaei ka bym lah ban pdiang.

Nalor kata ka la ong ruh ba kane ka jingleh jong uwei u pulit riam jaiñ iong kumba la sakhi  lyngba ki kor ring dur (Video) kiba la saphriang ka dei ka jingthmu ban pynpynsaw ia kitei ki arngut ki kynthei briew kiba dei napoh ka shnong Mawlai Mawtawar, Umjalimut.

Shuh shuh ka KSU ka la ong ba kane ka jingleh jong utei u pulit ka dei ym tang ka jingleh kput lane leh rhah hynrei ka dei ka jingthmu wat ban shim ia ka jingim ka jong kitei ki kynthei briew ki bym don bynta eiei ha kane ka jingiakynad kaba mih ha ki thaiñ Khyndailad hynne ka sngi.

Kumta ka KSU ka pynrem jur ia kane ka jingthombor ki pulit ki bym shym la don ka mynsiem isynei shuh wat ia ki kynthei briew, bad ka seng  ka dawa ba ki bor bahalor ki dei ban pynshitom mardor ia ki pulit kiba donkti ha katei ka jingthombor.

Shuh shuh ka seng ka pynpaw ruh ka jingkyndit ia ka jingpyni bor ki pulit ia la ki doh ki snam hapoh sor Shillong hynrei katba ki pynrit bad pyndem tdong pat ha ki thaiñ khappud.