Pynrem jur ka kur Bamon Suja Phalangki halor ka jingshah pyniap dusmon kong (L) Ailem Bamon

Syllad | The Rising MeghalayaJune 11, 2024

Ka Kur Bamon Suja Phalangki kala pynrem jur halor ka jingshah pyniap dumon ka Kong (L) Ailem Bamon kaba na ka shnong Sahsniang A.

Kumban shu pynkynmaw kane ka jingjia shah pyniap ka kong (L) Ailem Bamon kala jia haka 9 tarikJylliew haka por kumba 1 baje mynsngi hapoh kawei ka jaka rep. Ha kane ka jingjia uwei pat u briew uba kyrteng u Ki Dkhar ruh u la mynsaw jur na ki bynta jong u ryndang ha katei ka jingshah thombor bad don mynta hapdeng ka jingshah sumar hapoh Civil Hospital, Jowai. Ha ka juh ka sngi ki pulit ka Raliang kila iohkem ia u suba donkti, u Wanpyrkhat Lathong 43 snem rta uba dei na ka shnong Niawkmai.

Na kaliang ka kur Bamon Suja Phalangki, ha u kyrwoh bala phah kila pynpaw iaka jingkyndit bad ka jingsngew smiej halor kane ka jingjia shah pyniap jong ka Kur ka jait na Sahsniang ha u Wan Lathong. La pynpaw ba ha kane ka sngi ka (L) Ailem Bamon ka leit ban wad tit khlaw na khlaw na ka bynta ban bam, pynban im tip ha ka jingwad ia ka jingbam kala shah pyniap dusmon pynban ha u Wan Lathong  jong ka shnong Niew kmai.

Kane ka jingleh riewkhlaw khlem da khein iaka mynsiem briew jong une u riew thrang snam kaba buh ia ngi kum ka ïing ha ka jingsngewsih kthang kaba shyrkhei bha.

Ka Ailem Bamon kaba la kynduh lypa ia ka jingeh ha ka jingim jong ka ha kaba u lok jong ka u khlem ia shong shuh bad ka, bad ka don marwei ban bsa ia ki hynreiw ngut ki khun jong ka. Nalor kine iwei i ba dang 1 snem ka rta iwei pat iba don ka jingduna ha ka bor pyrkhat pyrdain. Kane ka jingleh jong une u Wan Lathong ym tang ba u shim ia ka jingim jong kane ka kmie hynrei u la buh ia kine ki khun ha ka jingeh kaba ngim lah shuh ban mut dur, la ong ka kur Bamon Suja Phangki.

Kumta ngi kum ka Kur Bamon Suja Phangki ngi pynrem jur ia kane ka jingleh jong une u briew da kaba pyniap ia kane ka kur jong ngi da kaba ot na ryngdang ia ka bad ngi kyrpad ruh ia ka bor kaba dei peit ban pynshitom jur ia une u riew thrang snam U Wan Lathong kat kum ka kyndon ain. Ngi dawa ba ka bor jong ka ain ka dei ban ai ia ka jingbishar ia ka hok ba kam dei ban pynlyngkot ia ka kti jong ka ban pynshitom ia une u briew ia kane ka jingleh bymsngew briew shuh jong une u briew.

Ngi kyrpad ia ka imlang sah lang ban ieng ryngkat bad ngi ban wad ia ka jingbishar ia ka hok khnang ba ka bor kaba dei peit kan ym map ia kum une u jait briew na ka bynta ka shong syier ki kynthei ki khynnah.

Ka jingduwai jong ngi ka long ia kane ka longïing, khamtam eh ba U Blei Un ri Un sumar ia kine ki khun ba kin ioh bor bad ka jingpyntngen ha ka mynsiem jong ki.