Pynrem jur ka Kur Suting ba shah thombor ka longkmie ha la u jong u kurim

Syllad | The Rising MeghalayaNovember 22, 2024

Ka seng Kur Suting Khasi Jaintia lyngba u General Secretary Bah HS Suting ka pynrem jur ia ka kam riewkhlaw jong u Dahun Dkhar uba la thombor ia la ka jong ka kurim bad u khunruit jong u uba dang shi snem shiteng.

Na ka liang ka seng kur ka la ong ba kane ka jingjia kam thombor ka dei kaba la jia ha ka taiew ba la dep hapoh ka iingsah jong kane ka longkmie ha ka shnong Niriang, West Jaintia Hills, ha kaba u kurim jong ka u la thmu ban shim ia ka jingim jong i da kaba theh da ka umphniang khluit na ki met jong ki.

Hynrei, da ka jingisynei jong U Blei une u khunruit jong u, u la lait thaw na ka jingmynsaw, hynrei ka longkmie kala shitom jur bad don hapdeng ka jingshah sumar hapoh Civil Hospital, Shillong bad mynta la pynkynriah noh shapoh NEIGRIHMS hospital ban ioh ia ka jingsumar kaba kham biang.

Ka Seng Kur ka pynrem jur ia kane ka kam riewkhlaw jong une u Dahun Dkhar bad ka kyrpad ia ki bor jong ka ain ban leh da kaba kham tyngeh khnang ba kum kine ki jait jingjia kin ym wan jia shuh hadien habud.

Ha kajuh ka por ka Seng Kur ka pynpaw ka jingsngew nguh ia ki bor pulit, i Kong Delina Khongdup dkhot ka National Commission for Women, ka State Women Commission, ia ki doktor bad ki nos kiba la shimkhia ia kane ka kam bad ruh ia u MLA ka Jowai u Bah Wailad Shylla uba la wan jngoh da lade ha Civil Hospital, Shillong kumjuh ia kiwei kiwei pat.

Na ka liang ka Seng Kur ka ai ka jingkitbok kitrwiang ia ine i longkmie ba in ioh noh kham kloi ia ka jingkoit jingkhiah.