Pynrem jur ka Meghalaya BJP ba shah pyniaid lyngkhuid ka trai shnong riewlum ha Karnataka

Syllad | The Rising MeghalayaDecember 17, 2023

Ka BJP Meghalaya Mahila Morcha ka pynrem jur ha kaba iadei bad ka jingjia shah pyniaid lyngkhuid jong kawei ka trai shnong riewlum ha Belgavi Karnataka, da kaba ong ka dei ka kam riewkhlaw ka bym lah ban pdiang.

Na ka liang ka president ka Meghalaya BJP Mahila ka Kong Sukhi Pariat ka la ong, “Ka BJP Meghalaya Mahila Morcha ka pynrem tyngeh ia kane ka kam bymman pyrshah ia ka pyrshah ia ka longkmie riewlum.Kane ka kam thombor ia ka longrynieng jong ki kynthei ka long pyrshah ia baroh ki kyndon jong ka pyrthei shai bad kaba pynpangnud shibun na ka bynta iwei pa iwei ki nongshong shnong kiba pyrkhat ia ka lynti jong ka hok. Kane ka pynpaw ruh halor ki kam thombor pyrshah ia ki kynthei ha ki jylla ba la synshar da ka Seng Congress.

Shuh shuh ka la ong ruh ba ka sorkar jylla ka dei ban shim ia ka jingkitkhlieh halor ka jingpynshlur ia kiba kum kine ki kam bymman bad ruh ban pynshitom da kaba tyngeh pyrshah ia ki briew kiba donkti khnang ba kum kine ki jingjia kin ym wan jia shuh hadien habud.

“Ngi ki longkmie ha ka BJP ngim lah ban pdiang ia kiba kum kine ki jingjia kiba la jia hajan man ki jylla ba la synshar da ka Seng Congress.Ka party jong ngi kaba la pynkhamti ia ka longkmie riewlum kum ka president jong ka ri India bad jied ia u trai shnong kum u Myntri Rangbah jong ka jylla,” ka la ong shuh shuh.

“Ha kawei pat ka bynta, ngi don ia ki party kum ka Congress kiba ki rukom pyrkhat jong ki, ki buh jingma ia ki kynthei bad ia ki trai shnong rit paid hapoh ki jaka kiba ki synshar. Nga kyrpad jur ia ki paid nongthep vote ba kin ai jingsneng ha ka ilekshon ka ban wan. Kumba u Myntri Rangbahduh ka ri u Narendra Modi u la ong, “Ka India ka ban lait na ka Congress, ka dei ka jingphohsniew kaba wan urlong da shisha,” ong katei ka nongialam ka BJP.

Ha kaba iadei bad kane ka jingjia kaba la pynkhihwin ia kiba bun balang, na ka liang u president ka BJP hapoh ka ri u Jagat Prakash Nadda ruh u la pynrem jur ia kane ka kam bymman bad thaw ruh ia ka kynhun jong ki san ngut ki dkhot ka committee ba kin pynlong ka jingleit jurip sha katei ka jaka ba la jia kane ka jingshah thombor. Na ka liang ka committee kan aiti mardor ia ka kaiphot halor kane ka jingjia sha u president ka party.