Pynrem jur ka RBSU ba pyniakhalai laitlan ki bar jylla ha ka shnong Baridua

Syllad | The Rising MeghalayaNovember 9, 2023

Ka Seng Ri Bhoi Students’ Union (RBSU) Central Body ha u kyrwoh lyngba u Bah Everjoy Nongpluh, President ka pynrem jur ha kaba iadei bad ka kam pyniakhalai kynruh laitlan jong ki bar jylla hapoh ka shnong Baridua, Ri Bhoi District, Raid Marwet kaba la sdang naduh ki sngi puja kat haduh kine ki sngi kiba mynta.

Ka Seng ka pynrem ruh ia ka Dorbar Shnong Baridua ha kaba iadei bad ka jingioh ban pynlong ia kiba kum kine ki jingpyniakhalai beain kiba khlem sangeh hapoh shnong poh thaw kiba ktah jur ia ka jingsngew jong kiba bun balang khamtam hapdeng ki nongshong shnong jong kane ka shnong.

Ka Seng ka pynpaw ruh ka jingsngew bynniaw kaba jur khamtam ba kane ka jingpyniakhalai ka kham heh shuh shuh ha ka sngi U Blei ia kaba ki ju pynlong naduh ka por 9 baje mynstep haduh ban da miet khlem da burom shuh ia ki nongshong shnong kiba long Khristan.

Kumta ruh ka Seng ka pynpaw ka jingsngewkhia bad ka jingsngew lyngngoh kaba jur halor ka jingioh jingbit ban pynlong ia kiba kum kine ki kam iakhalai kynruh da ki bar jylla ha kylleng ki jaka jong ka shnong Baridua.

Kumba ka long mynta ka Seng ka la ong ba ym tip shuh mano ba aibor ban leh ia kiba kum kine ki kam beain ha shnong ka thaw, kata da kaba buh ruh ia ka jingkylli ba hato dei ka Dorabr Shnong Baridua ne ka tnat pulit kiba ai jingbit ban pynlong ia kine ki kam iakhalai wat ha ka por mynsngi mynshai hapoh shnong poh thaw.

Shuh shuh ka Seng ka kyntu jur ia ki bor ba dei khmih ba ki dei ban shimkhia mardor ban khanglad ia kiba kum kine ki jingleh kiba ktah jur ia ka imlang ka sahlang hi baroh kawei.