Pynrem jur ka SAFF ba kynnoh ka KSP ia ki Khristan halor ka jingjia ha Mawkynrew

Syllad | The Rising MeghalayaJanuary 24, 2025

Ki dkhot ba pawkhmat ka Shillong All Faiths Forum (SAFF) ki la pynpaw ka jingsngew bynniaw kaba jur halor ka jingkam jong ka Seng Kutumba Surakshya Parishad (KSP) na Assam ba ka jingjia ba dang shen ha ka shnong Mawkynrew ka dei ka jingleh ka bym shym la burom ia kiwei ki niam.

“Ka SAFF kam lah satia ban pdiang ia kane ka seng ia kaba la iohi ba ka nangpynkhluit ia ka mat kaba iadei bad ka jingjia ha Mawkynrew bad ban pynheh sha ka jingiakynad ka ban wanrah ka jingiapait iapra bad kaba ktah ia ka niam ia kiba ym lah satia ban pdiang.Kane ka dei ruh ka juh ka seng kaba dang shen ka la byrngem ia ki briew jong ngi da ka pakhang surok halor kawei pat ka mat kaba iadei bad ka kam jngohkai ha ka jylla jong ngi,” ong u Vice President ka SAFF u Bah Noor Nongrum lyngba u kyrwoh.

Nalor kata u Bah Nongrum u la ong ruh ba katkum ki khubor lyngba ki lad pathai khubor la iohi ba ki paidbah kiba don bynta ha ka jingjia ha Mawkynrew kim dei satia kiba la ithuh na kata ka jingiadei bad ka niam, bad ka long kaba bakla jur ia ka KSP ba kan shu mutdur bad kynnoh ia ki paid Khristan ha kane ka rukom.

Ha kajuh ka por ka SAFF ka kyntu ruh ia ki paidbah bad ia ki nongialam shnong jong ka thain Mawkynrew ba kin iatreilang bad ki bor ba dei khmih na ka bynta ban pynbeit ia kane ka kam da ka jingiasngewthuh jingmut lang bad ban khmih na ka bynta ban pynneh ia ka shongsuk shongsain.