Pynrem jur ka SPC ia u nongialam ka VPP ba kynthoh khlem nongrim ia ki nongpathai khubor

Syllad | The Rising MeghalayaMarch 29, 2024

Ka Shillong Press Club (SPC) haka sngi Palei ka la kynthoh tyngeh ia u nongialam ka VPP uba dei ruh u MLA napoh Nongkrem Constituency u Bah  Ardent Miller Basaiawmoit halor ki jingkren kynthoh khlem nongrim  pyrshah ia ki nongthoh khubor ka jylla khamtam ha ka thain Rilum Khasi bad Jaintia.

“U Bah Ardent u la kren kynthoh khlem nongrim, khlem ka tyllong bad khlem ki sakhi satar kaba la ktah jur ia ka jingtreikam  jong baroh ki nongpthai khubor kiba hapdeng kiba bun ki jingeh ki la pyrshang ban iaid shakhmat ha ka lynti kum ki nongthoh khubor halor ka hok ban kren bad ban pynpaw kumba la kdew ha ka Riti synshar khadar jong ka ri,” ong u president ka SPC u Bah David Laitphlang ha ka jingkren.

U la ong ruh ba kane kam dei satia ka sien kaba nyngkong ba u Bah Ardent u la pyrta shla halor ki daw kiba tang ma u hi u tip ban thew iano iano ki bym iahap jingmut. 

“Ka Shillong Press Club ka pynrem jur ia kane ka jingkynthoh bym shong nongrim bad ka jingleh bym iahap dur na ka bynta u briew ia uba la ngeit ba u don ia katto katne ka dor hapoh ka imlang sahlang.Kumta ruh kan kham suk na ka bynta jong u ban shu boycott ia ki nongthoh khubor khnang ban kiar na ki jinglong jingman ki bym sngewtynnad na ka bynta jong u bad na ka bynta ka party sain hima jong u namar ki don ia ka bynta ban shakri na ka bynta ka bha ka miat jong ki paidbah ka jylla Meghalaya hi baroh kawei,” ong u Bah Laitphlang.

Ka jingdawa panmap na uba kum une u briew uba shemphang ka dei tang ka jingpynlut kai ia ka por, bad kumta na ka liang ka Shillong Press Club ka iehnoh ha ka jingstad jong ki paidbah, ki nongpule bad ki nongpeit ia ki khubor ba kin shim ia ka rai, kata mano, mynno, kumno ngi leh bakla, ong u nongialam ka SPC

“Ban kynthoh ia kaei kaba tei, ngi pdiang sngewbha namar ka iarap ia baroh ban pynbha ialade, hynrei ban shu kren lap lah da ka jingsngewskhem halor ki kam bym tip bha, ka dei ka lynti kaba bakla ban shakri ia ki para briew. Haba kut, ngi hap kynmaw ba ngim dei ban bishar bym hok iano iano ruh, namar baroh ngin sa shah bishar ha kawei ka sngi,” ula ong.