Pynrem jur ka USTM ia ka jingkynthoh u Myntri Rangbah ka Assam ia skul bah kum kaba thok

Syllad | The Rising MeghalayaFebruary 21, 2025

Ka University of Science and Technology Meghalaya (USTM) ka la pynrem jur ia ka jingkynthoh ba dang shen jong u Myntri Rangbah ka Assam u Himanta Biswa Sarma ha kaba u la kynnoh ia kane ka skul bah kum kaba thok.

Ha u kyrwoh kaba la pynmih ha ka 20 tarik Rymphang, ka USTM ka la ong ba kiba kum kine ki jingkynthoh ki ktah jur ia kynhun ba dei khmih ba hakhliehduh jong ka ri India kiba la ai ka jingithuh halor ka jingtbit bad ka jingkiew shaphrang jong kane ka university ha ka liang ka pule puthi.

Ka USTM ia kaba la seng ha u snem 2011 ka dei kaba la shah pynhap kyrdan ha ka ‘A’ Grade accreditation da ka NAAC ha ka jingbishar bniah ba nyngkong jong ka bad haka kyrdan hapdeng ki 200 tylli ki university kiba pawnam tam ha ka ri India da ka National Institutional Ranking Framework (NIRF), Ministry of Education, na ka bynta ki lai snem kynthih. Nalor kata kane ka skulbah ka la wan ruh ha ka kyrdan kaba 52 ha ka Nature Index kaba pynpaw ha ka jingkiew kaba shakhmat eh ha ki kam wad bniah bad ha ka liang ka saian. Ka Meghalaya Private University Regulatory Board (MPURB) ka dei kaba buddien ia ki kyrdan jingpule jong ka USTM bad kaba la pynskhem ia ka jingshaniah jong ka.

Haba kyntait ia ki jingkynnoh, ka USTM ka la pynskhem biang ba baroh ki rukom aijinghikai, ki jingpule bad ki jingbishar bniah ki dei kiba iaid ryntih katkum ki kyndon jong ka UGC. Ki prokram PhD jong ka skulbah ki bud ryntih ia ki rukom wad bniah ba pyrkhng kaba shai bad kaba iahap katkum ki kyndon jong ka UGC. Ki prokram PhD jong ka skulbah ka bud ia ki rukom wad bniah kiba shai kiba iahap bad kiba la jam palat ruh ia ka standard ba la buh da ka UGC. Ka jingpeit bad bishar bniah ia ki jingwad bniah la leh ruh da ki riew shemphang kiba nabar, kata na ki jaka pule ba pawnam kum ka IIT Guwahati, ka JNU, Delhi University, Tezpur University bad North-Eastern Hill University.

Haduh mynta, ka USTM ka la ai haduh 11 tylli ki PhD hapoh ka jingialam jong ki nonghikai, ka la ioh 140 tylli ki hok ne patents (ba la pynmih /ai), ka la pynmih 1,085 tylli ki kot wad bniah ha ki jingthoh ba pawnam jong ki ri ka pyrthei, ka la pynmih haduh 350 tam ki UGC NET & GATE qualifiers bad phah ruh ia ki samla sha ki jaka pule kum ka IISc Banglalore, IITs, bad Central University na ka bynta ki jingpule kiba kham shalor.

Ka USTM ka la pynpaw ia ka bynta jong ka kum ka nongpyniaid ia ki jingialang ba pawkhmat ha ka ri bad ka pyrthei, kaba kynthup ia ka National Conference of Vice-Chancellors 2023, ka la pynlong ia ka Association of Indian Universities (AIU), ha kaba haduh kumba 400 ngut ki Vice-Chancellor bad Director ki la wan iashim bynta.Kane ka skulbah ka la pdiang ruh ia ki nongshah khot sngewbha ba donburom kiba kynthup ia ki president barim, u Dr. A.P.J. Abdul Kalam bad u  Ram Nath Kovind, ki chairperson ka UGC bad NAAC, ki heh ka UPSC, bad ki dkhot ka Kynhun Myntri.

Da kaba kyntait ia ki jingkynnoh kum ki bym don nongrim, ka USTM ka la ong, “Kum kine ki jingkren kim pynsniew tang ia ka nam jong ka jaka pule kaba lah ban shaniah hynrei ki pynduh mynsiem ruh ia ki hajar ngut ki samla pule, ki nonghikai, bad ki nongwad bniah kiba ialeh ban long kiba tbit.” Ka skulbah ka la khot paidbah ia kano kano ka jingtohkit ne jingtohkit ba thikna ban pynshisha ia ki jonglong jong ka.