Pynrem jur ki Seng pyniaid kam jngohkai ia ka jingkhanglad ka HNYF ia kiba thmu leit Sohra, Dawki

Syllad | The Rising MeghalayaJuly 27, 2024

Ki kynhun Seng bapher bapher kiba pyniaid bad trei na ka bynta ki kam jngohkai ha Meghalaya ha ka 26 tarik Naitung kila pynrem jur ia ka jingkhanglad bad pynphai jong ki dkhot ka seng Hynniewtrep National Youth Front (HNYF) ia ki nongwan shangkai pyrthei kiba thmu ban leit sha ki thain Sohra bad Dawki.

Kine ki kynhun seng kiba kynthup ia ka Tourism Operators Association of Meghalaya (TOAM), Federation Shillong Hotels (FSH), Meghalaya Rural Tourism Forum (MRTF), Tour Guide Operator Association of Meghalaya (TOAM), Meghalaya Tourist Development Forum (MTDF), Tour Guide Association of Meghalaya (TGAM), Department of Tourism & Travel Management, Martin Luther Christian University Department of Tourism & Hotel Management, NEHU bad kiwei kiwei ki la pynpaw ia ka jingsngewkhia kaba jur halor kane ka jingjia bad ka ban ktah jur ruh ia ka kam jngohkai hapoh ka Jylla.

“Kumba phi tip, ka kam jngohkai pyrthei ha ka jylla ka la poi sha ka jingkiew jong ka ha kine ki khyndiat snem bad kane ka jingjia kaba la jia tang shisien ka la ktah jur ia ka kam ngi kum ki kynhun ba ia don bynta ngi la tei ha kine ki snem. Na ka bynta ka jingtip jong phi, ka jingjia hynne ka sngi Thohdieng ka la wanrah ia ka jingduhnong kaba la kot haduh 30% na ka jingwai ia ki jaka sah bad kiwei kiwei. La khmih lynti ruh ba sa 50% ki nongshangkai kin sa pynsangeh ban wan shangkai sha kane ka Jylla naduh lashai ka 27 tarik namar ka khubor jong kane ka jingjia kala pur sted ha kylleng ka ri,” ki la pynpaw.

Ki la ong ruh, “Ngi kiba don bynta ha ka kam jngohkai pyrthei ngi don ha ka jinglyngngoh kaba khraw ban iohi ba ki Sengbhalang Pressure group bapher bapher ki don ïa ka jingïaid laitluid ha ka Jylla bad ki leh kum ka sorkar. Ngi ki nongsoi harum, ngi kyntu jur ia ki sengbhalang bapher bapher ban kiar na kum kine ki kam pynjah burom bad ki kam beain kiba pynieng pynsmiej bad pynher syrngiew ia ki nongwan jngohkai pyrthei bad ki nongleit jingleit ki bym don bynta ha ki kam sain pyrthei ka jylla.

“Kane ka jingjia kaba tang shisien kala ktah ia ki jingtrei borbah kaba da ki snem ban khring ia ki kam jngohkai pyrthei bad ka ban dang shim por ruh ban wanphai sha ka jinglong jingman kumba ka dei ban long baroh shikatta,” ki la bynrap. “Ngi la long tang kum ki nongpeitkai kiba sngap jar halor ki mat bapher bapher jong ka jingleh beain hapoh bad sawdong jong ka nongbah Shillong bad ki thain Ri Bhoi kiba la wanrah ia ka jingthombor bad jingpyntieng ia ki nongtrei kiba don ha ki kam pynroi ia ki kam jngohkai pyrthei.”

Shuh shuh ki la pynpaw ruh ba kine ki jingjia jong ka jingleh beain ki la poi ha u pud  ba wat ki nongwan jngohkai pyrthei kiba wan sha kane ka jylla mynta ruh kim shym la lait. Kawei pat ka jingduhnong nalor kiba kum kine ki jingleh ka dei ka jingai jingmut ba dang shen jong ka Sorkar US kaba maham ia la ki jong ki nongshong shnong ban ym leit sha Meghalaya – kane kam pynlong ban pynduh mynsiem tang ia ki nongjngohkai pyrthei napoh US hynrei ka ai ka khubor kaba jam sha baroh ki nongjngohkai pyrthei nabar ri bad kumjuh ruh napoh ka ri kiba kwah ban wan sha Meghalaya.